Kryeministri Edi Rama ka reaguar vetëm para pak minutash lidhur me kërkesën e Prokurorisë së Krimeve të Rënda për heqjen e imunitetit dhe arrestimin e deputetit Saimir Tahiri.
Kryeministri Rama shprehet se do drejtësi, ndërsa shton se uron që Saimir Tahiri të provojë deri në fund që s’ka lidhje me këtë histori kriminelësh.
Ndërkohë para pak minutash vetë deputeti Tahiri ka dalë nga banesa e tij, teksa ka thënë shkurt për mediet: Nuk keni parë gjë akoma!
POSTIMI I RAMËS:
Kur them dua një vend me drejtësi kuptoj vetëm drejtësi! Kur them dua të vërtetën nga drejtësia s’e bëj si ata që veç janë tallur dhe tallen me drejtësinë prej 27 vjetësh rresht! E besoj këtë fjalë megjithë mend dhe luftoj për kuptimin e plotë të kësaj fjale, megjithë zemër. Drejtësi për të gjithë dhe drejtësi mbi këdo.
Uroj që Saimiri të provojë deri në fund që s’ka lidhje me këtë histori kriminelësh. Por këtë dua ta mësoj nga drita e së vërtetës dhe këtë dritë s’e kam as unë, as qeveria, as partia. E ka vetëm drejtësia që duhet të na e ndriçojë këtë udhëkryq mes llafeve e provave. Deri në fund.
