Tekniku i Skënderbeut Ilir Daja ka dalë në konferencën për mediat, para sfidës me Partizanin e Beogradit që do të zhvillohet nesër në mbrëmje në “Elbasan Arena”. Daja u shpreh optimist për sfidën dhe shprehet se kanë eksperiencën e duhur për të përballuar ekipe të tilla.
“Kundërshtari ka cilësi individuale shumë të mira, por ne kemi eksperiencën e duhur për të përballuar edhe ekipe si Partizani i Beogradit. Do të kërkojmë të jemi pragmatistë dhe të marrim 3 pikët, por që të bëjmë këtë, duhet të komandojmë pjesën më të madhe të lojës dhe të mos i lejojmë kundërshtarët të ndërtojnë raste të rrezikshme”, tha trajneri i korçarëve.
Për masat e rrepta të sigurisë dhe tensionin që ka brenda kjo sfidë, Daja kërkon që tifozët të vijnë për të mbështetur ekipin dhe këta të fundit tua shpërblejnë me fitore.
“Ka një lloj tensioni të jashtëm, por ne kemi gjithë javën që e përgatitim ekipin për ta shmangur këtë dhe për t’u përqendruar te loja. Mbështetjen e publikut duhet ta shpërblejmë vetëm në fushën e lojës, duke fituar takimin, pa menduar për gjëra të tjera që nuk kanë lidhje me sportin”, tha Daja.
Në rast fitoreje të kësaj sfide Skënderbeu ka të drejtë të ëndërrojë për të kaluar fazën e grupeve. Kjo është një mundësi reale por që duhet treguar në fushë duke u përqendruar tek çdo ndeshje dhe të japim maksimumin për të marrë atë që kërkojmë.
“Natyrisht që situate në grup na jep mundësinë të pretendojmë kalimin më tej dhe ne do të bëjmë maksimumin për t’u renditur të dytët. Marrja e 3 pikëve nesër është një hap i rëndësishëm në rrugën drejt kualifikimit, kjo edhe për faktin se Young Boys do të luajë ndaj skuadrës më të fortë të grupit dhe mund të dalë pa pikë, por ne duhet të përqendrohemi vetëm te ndeshjet tona dhe të japim maksimumin”, u shpreh Ilir Daja.
Tekniku i korçarëve pranoi se formacioni i ekipit është konsoliduar tashmë, teksa do të zëvendësohen vetëm futbollistët e dëmtuar. Daja nuk e fshehu se do të donte fitoren edhe si dhuratë për ditëlindjen e tij, një ditë pas takimit.
