Të paktën 276 persona u vranë të dielën në Mogadishu, si pasojë e një sulmi me kamion-bombë, që shpërtheu duke marrë jetën e shumë personave.
Kjo ngjarje po konsiderohet si sulmi më i tmerrshëm terrorist në historinë e Somalisë.
“Ky është sulmi më vdekjeprurës”, tha polici Ibrahim Mohamed, i shokuar nga ajo që ndodhi ditën e djeshme.
“Është shumë e vështirë të kemi një numër të saktë të viktimave, pasi disa prej tyre u dërguan në qendra të ndryshme mjekësore, ndërsa disa të tjerë u morën nga të afërmit për t’u varrosur”, shtoi ai.
Shumica e trupave nuk njihen për shkak të djegieve të shumta, ndërsa numri i viktimave po rritet ndjeshëm teksa të plagosurit rëndë nuk po arrijnë t’i përballojnë plagët e marra.
Pas sulmit, presidenti Mohamed Abdullahi Mohamed shpalli tre ditë zie. Qeveria somaleze fajësoi Al-Shabaab për sulmin, një grup terrorist islamik që ka luftuar kundër Mogadishut. Organizata e lidhur me Al-Kaedën nuk ka marrë asnjë përgjegjësi për sulmin e së dielës.
Al-Shabaab ka kryer sulme të shumta të kohëve të fundit në qytet duke përdorur granata, armë dhe bomba në përpjekjen e saj për të rrëzuar qeverinë, e cila mbështetet nga OKB.
Në janar, grupi terrorist vrau të paktën 28 vetë duke sulmuar me një makinë-bombë në një hotel pranë parlamentit, ndërsa në qershor, ky grup vrau 31 vetë në një sulm në një restorant pica.
“Ata nuk duan t’ia dinë për jetën e njerëzve somalezë, nënave, baballarëve dhe fëmijëve”, tha kryeministri Hassan Ali Khaire për bombardimet e fundjavës. “Ata kanë shënjestruar zonën më të populluar në Mogadishu, duke vrarë vetëm civilë”.
Sekretari i Jashtëm Boris Johnson tha të dielën: Mbretëria e Bashkuar dënon në terma më të fortë sulmet frikacake në Mogadishu, të cilat kanë marrë kaq shumë jetë të pafajshme. Ata që janë përgjegjës nuk kanë treguar asnjë lidhje me humanizmin apo vuajtjet e popullit somalez. Britania do të vazhdojë të mbështesë Somalinë në luftën kundër terrorizmit./ Tirana Today
