Demarkacioni i Kufirit me Malin e Zi është një nga çështjet që ndikon drejtpërdrejt në integrimin e Kosovës.
Kështu ka deklaruar ambasadori i ri i Gjermanisë në Kosovë, Christian Heldt, i cili porositi drejtuesit e institucioneve kosovare që ta përmbyllin sa më shpejt Demarkacionin e Kufirit me Malin e Zi.
Heldt tha ndër të tjera se sa më shumë të vonohet ratifikimi i Marrëveshjes së Kufirit, aq më shumë do të vonohet edhe liberalizimi i vizave me BE-në.
“Qeveria e re si dhe shumica e re parlamentare duhet sa më shpejt ta përmbyllin çështjen e demarkacionit me Malin e Zi, pasi që një gjë është e sigurt: Sa më shumë zvarritet ratifikimi i Marrëveshjes, aq gjatë do të duhet të presin qytetarët e Kosovës për liberalizimin e vizave me Bashkimin Evropian”, deklaroi Heldt.
Ky i fundit theksoi edhe rëndësinë e luftës ndaj korrupsionit, teksa e cilësoi gjithashtu një kriter për liberalizimin e vizave.
