Drejtori i Policisë së Shtetit, Haki Çako ka zhvilluar një takim me drejtorët vendorë të Policisë, shefat e Komisariateve dhe të stacioneve policore, si dhe me drejtorët rajonalë të kufirit dhe migracionit.
Gjatë këtij takimi, Çako u fokusua në katër pika kryesore, të cilat vijojnë si më poshtë:
- Kontroll të rreptë territorit, luftë të ashpër ndërtimeve pa leje. Ndëshkim për drejtuesit e policisë, drejtuesit vendorë dhe punonjësit e Agjencive të pronave për çdo abuzim.
- Goditje grupeve kriminale dhe trafikut të drogës, konfiskim të aseteve të përfituara nga veprimtaria kriminale.
- Evidentim dhe ndëshkim të krimeve mjedisore dhe rasteve të vjedhjes së energjisë elektrike.
- Sjellje dhe marrëdhënie korrekte me qytetarët, ndjekje me përgjegjësi e në kohë të çdo shqetësimi apo konflikti, disipline në punë dhe rritje të integritetit të punonjësve të policisë në komunitet.
Kreu i Policisë së Shtetit shprehu vlerësim për punën e kryer nga të gjitha strukturat, ndërsa shtoi se ka ende disa mangësi për të cilat duhet puuar shumë, shqetësime dhe porosi të cilat vijnë direkt nga kryeministri nëpërmjet përcjelljes së mesazheve dhe ankesave të qytetarëve në të gjithë vendin.
“Krahas punës së mirë që është bërë, përsëri vihet re se në drejtim të goditjes së fenomeneve të paligjshmërisë në të gjithë territorin e vendit ka mangësi dhe për këtë qëllim jemi mbledhur sot për të përcjellë disa mesazhe, porosi dhe shqetësime të cilat kanë të bëjnë me këtë fenomen.
Vihet re një neglizhencë në evidentimin, hetimin dhe goditjen e fenomenit të veprave penale që cenojnë regjimin juridik të tokës të tilla si ndërtimet e paligjshme, pushtimet e tokës, pronës si publike dhe private, ambienteve publike etj. Rasti i fundit i ditës së djeshme në Tirane tek Parku i Liqenit”, tha Çako.
Gjithashtu, kreu i Policisë së Shtetit kërkoi zbatimin korrekt të disiplinës në punë dhe rritjen e integritetit të punonjësve të policisë në komunitet.
Theks të veçantë iu vu marrëdhënies me qytetarët duke shmangur sjelljet arrogante dhe ndjekjen e çdo ankese me përgjegjësi.
Këtu Çako u ndal veçanërisht në marrëdhëniet me publikun të punonjësve të Policisë Rrugore, Patrullat e përgjithshme dhe punonjësit e pikave të kalimit kufitar, të cilët sipas Drejtorit të Përgjithshëm duhet të jenë model në këtë drejtim.
