Shumëkush e di se piktori i famshëm Vinsent van Gog, i zhytur në mjerim dhe i pavlerësuar nga bashkëkohësit vrau veten duke u vetëqëlluar në gjoks me një pistoletë.
Por, më shumë se një shekull më vonë, dy shkrimtarë amerikanë kanë hedhur dyshime të forta mbi vetëvrasjen e tij, duke pretenduar se artisti hollandez u qëllua për vdekje nga një adoleshent.
Stiven Naife dhe Gregori Smith, besojnë se Van Gogu u plagos rëndë nga vëllai adoleshent i një miku të tij, i cili po dëfrehej duke e ngacmuar dhe provokuar artistin e sëmurë mendërisht.
Gjatë një takimi në qytetin francez të Auvers-sur-Oise në vitin 1890, djaloshi hapi pa dashje zjarr me armën që mbante në dorë.
Ata gjithashtu përshkruajnë një tjetër teori, sipas së cilës Van Gog u qëllua nga dy djem të zonës që po luanin me një pistoletë e cila nuk funksiononte mirë.
Naifeh dhe Smith, të cilët kanë fituar më herët çmimin Pulitzer për biografinë e tyre ndaj artistit amerikan Xhekson Pollok, kane shpenzuar mbi 10 vjet duke hulumtuar mbi fundin misterioz të piktorit të njohur.
Sipas versionit zyrtar të vdekjes së tij, Van Gog ishte vetëm 37 vjeç kur hyri më mesin e një are në Auvers-sur-Oise mbrëmjen e 27 korrikut 1890, dhe u vetëqëllua në kraharor me një revolver.
Pas të shtënës, ai ishte në gjendje të kthehej në fshat, ku iu dha ndihma dy mjekë, që megjithatë nuk ishin të aftë të kryenin ndërhyrje kirurgjikale për të hequr plumbin.
Ditën tjetër plaga u infektua dhe Van Gog vdiq po atë mbrëmje, 29 orë pasi që qëlloi veten. Vëllai i tij Teo, i cili kishte nxituar t’i ndodhej në momentet e fundit, tha se fjalët e fundit të të vëllait të tij ishin:”Trishtimi do të zgjasë përgjithmonë”’.
Por, sipas dëshmive të tyre, Naifeh dhe Smith, pohojnë se kanë prova të forta kundër këtij skenari, pasi Van Gogu nuk la asnjë shënim para vetëvrasjes, dhe plumbi që e vrau hyri në trupin e tij “nga një kënd i pazakontë dhe i zhdrejtë – jo tamam me atë që do të pritej në një vetëvrasje”.
Ata pohojnë në librin e tyre se impresionisti holandez “nuk dinte asgjë mbi përdorimin e armëve”, dhe se “nuk u gjet ndonjëherë një armë” në vendngjarje apo diku tjetër. Megjithëse pikturat e Van Gogut janë sot ndër veprat më të shtrenjta të artit në botë, gjatë jetës së tij, artisti shiti vetëm një pikturë dhe jetoi në një varfëri të mjerueshme, teksa vuante edhe nga çrregullimet e vazhdueshme mendore.
Episodi famëkeq është prerja e veshit të vet, pas një zënke me piktorin Pol Gogen. Por edhe për këtë rast ka dyshime, pasi disa studiues pretendojnë se ishte Gogen që ia preu aksidentalisht veshin gjatë një dyluftimi me shpata, ndërsa të dy artistët ranë dakord ta fshihnin të vërtetën.
Ndërkohë disa studiues të tjerë, kanë spekuluar se papërgjegjshmëria në rritje e Van Gogut, mund të jetë shkaktuar nga gëlltitja e kimikateve nga ngjyrat e tij, varësia e tij ndaj alkoolit apo si pasojë e sëmundjeve seksualisht të transmetueshme si pasojë e marrëdhënieve të tij me prostitutat.
Përshtati për Tirana Today, Alket Goce
