Angela Merkel i ka dhënë “goditjen” e radhës Erdogan, teksa tha se zhvillimet gjatë javëve të kaluara kanë goditur rëndë lidhjet Gjermani-Turqi, ashtu si edhe ato BE-Turqi.
Këtë deklaratë, Merkel e bëri para Parlamentit gjerman, ku tha se referendumi i 16 prillit në Turqi nuk është mbajtur në kushte të drejta.
Pavarësisht deklaratave të forta, Merkel u tregua optimiste për përmirësimin e këtyre marrëdhënieve, teksa shtoi se nuk është as në interesin e Evropës, as të Turqisë që të largohen nga njëra-tjetra.
“Zhvillimet gjatë javëve të kaluara kanë goditur rëndë lidhjet Gjermani-Turqi, ashtu si edhe ato BE-Turqi. Por, ne do të punojmë drejt rikthimit të dialogut”, tha Merkel, e cila përmendi edhe arrestimin në Ankara të korrespondentit të një gazete gjermane, Deniz Yucel, të cilin e cilësoi si një veprim që “nuk është në pajtim me një shtet kushtetues”.
