Ivanka Trump, vajza e presidentit Trump mbrojti sot të atin për qëndrimet e tij ndaj grave, duke thënë se kritikat e medias ndaj sjelljeve të mëparshme të presidentit, po “mbahen gjallë nga shtypi”
Ajo i bëri këto komente në Berlin, në udhëtimin e parë jashtë, si anëtare e ekipit presidencial amerikan. Ajo tha se përvoja e saj dhe e punonjëseve të tjera gra në bizneset e të atit, “përbëjnë një testament të besimit të fortë që ka Donald Trumpi në potencialin e grave dhe aftësinë e tyre për ta bërë punën aq mirë sa dhe burrat”.
Komentet e zonjës Trump u bënë gjatë një paneli diskutimesh në kuadër të takimit të grave të Grupit të 20-ës, që trajtoi temën e mbështetjes së grave në biznes.
Në takim merrnin pjesë edhe kancelarja gjermane, Angela Merkel dhe drejtorja e Fondit Monetar Ndërkombëtar, Christine Lagarde.
Ivanka Trump u ftua në takim nga kancelarja Merkel. Gjatë këtij udhëtimi Ivanka do të vizitojë dhe memorialin që përkujton hebrenjtë e vrarë në Evropë gjatë Holokaustit.
