Presidenti i Kosovës, Hashim Thaçi, ka reaguar pas zhurmës që është bërë kohët e fundit për krijimin e “Shqipërisë së Madhe”. Ai është shprehur se nuk ka asgjë më të pështirë dhe njëkohësisht qesharake, se të dëgjosh riaktualizimin e propagandës së vjetër të kohës së Millosheviçit.
Propaganda e Serbisë nuk është aspak e rastësishme dhe ndër të tjera ka dy qëllime thelbësore:
“Së pari, të legjitimojë funksionimin e Serbisë së Madhe të krijuar përmes gjenocidit të kryer në Bosnje dhe Hercegovinë.
Dhe së dyti, t’i nxisë elementet nacionaliste dhe ekstremiste për të destabilizuar dhe cenuar integritetin territorial të Kosovës. Serbia nuk është ndjerë asnjëherë e penguar nga Shqipëria si shtet i pavarur dhe sovran.
Në takimet e dialogut në Bruksel, përfaqësuesit e Serbisë pa fije turpi kanë thënë disa herë se Serbia do të preferonte të dialogonte me Shqipërinë dhe jo me Kosovën. Por, një gjë e tillë nuk ka për të ndodhur kurrë, sepse Kosova shtet i pavarur dhe sovran është realitet i përhershëm”, shkruan Thaçi.
E gjithë kjo fushatë e orkestruar nga Serbia, sipas tij, është e përgatitur nga protagonistët e njëjtë, të cilët 20 vjet më parë kanë ushtruar zanatin e njëjtë. Ai thotë se fatkeqësisht, BE-ja me naivitetin e saj të zakonshëm në raport me Kosovën, po bie pre e kësaj propagande të Serbisë.
“Për rrjedhojë, nuk është rastësi që sjelljet dhe deklaratat e disa zyrtarëve të BE-së përputhen me ato të zyrtarëve të Serbisë, kur i referohen Kosovës. Unë nuk pres prej Serbisë të heq dorë nga ëndrrat e saj për rikthimin e Kosovës nën regjimin e saj, edhe pse e dinë që kjo është e pamundur.
Mirëpo, pres nga BE- ja që ta trajtojë Kosovën si shtet të pavarur e sovran dhe të mos manipulohet kaq lehtë nga Serbia”, thotë ai.
