Ministri i Punëve të Jashtme të Serbisë, Ivica Daçiç e shikon ‘Shqipërinë e Madhe’ si kërcënim ndaj paqes në Ballkan dhe Evropë. Ministri Daçiç është shprehur se BE-ja dhe SHBA-ja, si dhe Britania e Madhe, do të mbeten përgjegjësit kryesorë në rast se nuk reagojnë. “Tre superfuqitë të reagojnë ndaj deklaratave të fundit të politikanëve shqiptarë për bashkimin e trojeve shqiptare”, ka thënë Daçiç. Shqiptarët, sipas tij, po kërkojnë të bashkojnë Shqipërinë, Kosovën dhe të tri komunat me shumicë shqiptare në jugun e Serbisë: Preshevën, Medvegjën dhe Bujanocin.
Ivica Daçiç ka reaguar ndaj deklaratës së kryetarit të Bujanocit, Jonuz Musliut se “bashkimi i Shqipërisë me Kosovën është i pakuptimtë, pa bashkimin e Luginës së Preshevës, pa Medvegjën e Bujanocin”.
“Deklaratat e koordinuara nga Rama, Thaçi dhe Musliu tregojnë se “Shqipëria e Madhe” është synimi i gjithë shqiptarëve. Sot Musliu kërkon që Shqipëria të jetë deri në Nish, por nesër mund të kërkojë të jetë në Shkup, Ulqin apo dhe Epir. Nëse BE, SHBA-të dhe Britania e Madhe nuk reagojnë, atëherë këto shtete do jenë përgjegjës për pasojat” – ka thënë Daçiç
