1492 – Kristofor Kolombi nënshkruan kontratën me Spanjën, për të gjetur një rrugë të shkurtër detare për në Indi. Shumë historianë pretendojnë se Kolombi besonte se bota ishte e rrumbullakët dhe se një person mund të niset nga njëra anë e të mbërrijë në pikën e nisjes, pa u kthyer nga rruga. Ai u nis për të provuar se një udhëtim përtej Atlantikut drejt Azisë ishte i mundur. Udhëtimi kushtonte, ndaj Kolombi kërkoi pagesa të larta për shërbimet e tij; 10 për qind të të gjithë pasurisë (ari, erëza, tekstile, skllevër etj), që Spanja do të merrte nga tokat që ai do të vizitonte. Mbi të gjitha, Kolombi kërkoi që të quhej mëkëmbës i mbretit në tokat e zbuluara, si dhe admiral i deteve dhe oqeaneve.
1524 – Eksploruesi fiorentinas, Giovanni Verrazano, zbuloi gjirin e New Yorkut për llogari të francezëve. Gjatë udhëtimit të tij të tretë në Amerikën e Veriut, pasi kishte eksploruar Floridën, Bahamas dhe Antillet, Verrazzano ankoroi anijet e tij dhe zbriti në ishullin Guadeloupe, ku ra në duart e banorëve kanibalë (1528). Burime të tjera sugjerojnë se Verrazzano u ekzekutua për pirateri nga spanjollët në Puerto del Pico, Spanjë.
1534 – Sir Thomas More burgoset në Kullën e Londrës. Ai ishte avokat, filozof, autor, burrë shteti. Kur mbreti Henry shpalli veten udhëheqës suprem të Kishës në Angli, duke krijuar Kishën Anglikane që e lejoi atë të rimartohej, Thomas More dha dorëheqjen nga posti i këshilltarit të mbretit, në shenjë proteste. Gjithashtu, ai vazhdoi të argumentonte kundër divorcit të Henrit dhe ndarjes me Romën. Në vitin 1534, Thomas More u arrestua, u gjykua për tradhti dhe, më 6 korrik 1535 u ekzekutua në Tower Hill, Londër. Thomas More është shenjtor i Kishës Katolike.
1629 – Importohen për herë të parë kuajt në koloninë e Gjirit Massaçusets. Fillimisht, ata u sollën nga spanjollët në vitet 1500, por banorët autoktonë (indianët e Amerikës) nuk treguan ndonjë interes dhe kuajt u lëshuan në gjendje të lirë, të egër, duke u shtuar e duke u përhapur në mbarë kontinentin.
1704 – Botohet për herë të parë gazeta e suksesshme amerikane, Boston News-Letter, nga John Campbell, i njohur si librashitësi i Amerikës.
1790 – Atdhetari amerikan dhe nënshkruesi i Deklaratës së Pavarësisë, Benjamin Franklin, vdiq në Filadelfia, në moshën 84 vjeç. Ai është cilësuar si një nga njerëzit më të jashtëzakonshëm që bota ka njohur ndonjëherë: Franklin ndihmoi në themelimin e kombit të ri dhe u bë përcaktuesi i të qenit amerikan; njeriu praktik; shkrimtar, botues, shpikës, diplomat, biznesmen, muzikant, shkencëtar, humorist, udhëheqës shoqëror civil, kozmopolitan, gjeni.
1922 – Zhvillohet ceremonia e përurimit të punimeve për ndërtimin e shkollës Teknike Amerikane në Tiranë. I pranishëm ishte drejtori i Kryqit të Kuq amerikan për operacione jashtë vendit, Dr. A. Ross Hill, i ftuar nga kryeministri Xhafer Ypi. Ceremonia u zhvillua në oborrin e “Kolegjit të vjetër”, ku ishin mbedhur një numër i madh banorësh të Tiranës, nën tingujt e bandës muzikore të Vatrës nga Bostoni, dirigjuar nga kapiteni Thoma Nasi.
1961 – Rreth 1500 emigrantë të armatosur kubanë, të përgatitur nga CIA, zbarkojnë në Gjirin e Derrave në Kubë, për të nxitur një rebelim për të përmbysur regjimin. Ata u mbështetëtn nga qeveria amerikane dhe deri më 20 prill, shumica ishin vrarë ose kapur. Në dhjetor 1962, Kastro i liroi robërit në këmbim të 53 milionë dollarë ndihma në ushqim dhe ilaçe të siguruara privatisht në Shtetet e Bashkuara.
1969 – Palestinezi Sirhan Sirhan dënohet për vrasjen e Robert F. Kennedy. Ai vuan dënim të përjetshëm në një burg në San Diego, Kaliforni. Sirhani lindi në Jeruzalem, më 1944, por kishte emigruar në SHBA kur ishte fëmijë. Në vitin 1989, ai i tha gazetarit David Frost se problemi i tij i vetëm me Robert Kenedin ishte mbështetja për Izraelin.
1970 – Anija hapësinore Apollo 13 arriti në Tokë në mënyrë të sigurtë, pas fluturimit të dështuar në Hënë, për shkak të një avarie.
1975 – Kamboxhia – Phnom Penhi bie në duart e Khmer Ruzhëve; lufta e nxehtë pesëvjeçare civile kamboxhiane mori fund dhe do të zëvendësohej nga terrori i kuq. Khmer Ruzhët ishin komunistë dhe për 4 vjet në pushtet, e kthyen Kamboxhian në “fushë masive vrasjesh”, sipas filmit “Killing Fields”. Khmer Ruzhët besonin se brezi i prindërve ishte i përlyer e njollosur me kapitalizëm; ata i ndanë fëmijët nga prindërit për t’i indoktrinuar me komunizëm, si dhe hapën kurse e shkolla për t’u mësuar atyre metodat e torturës në njerëz. Pol Poti ishte udhëheqësi i tyre kryesor; para se të kthehej në Kamboxhia, Pol Poti kishte qenë në Paris, ku ishte bërë anëtar i Partisë Komuniste Franceze. Khmer është emri etnik i kamboxhianëve dhe shprehja “Khmer Rouge”, frëngjisht për “Khmer i Kuq” u përdor për herë të parë nga princi Norodom Sihanouk, për të cilësuar komunistët në Kamboxhia.
