Presidenti i Rusisë, Vladimir Putin do të mbledhë sonte Këshillin e Sigurisë, në mënyrë që të shqyrtojë sulmet ajrore amerikane në Siri.
Lajmi është bërë i ditur nga zëdhënësi i Kremlinit, Dmitrij Peskov, sipas të cilit, Rusia do të mbajë të hapura komunikimet e kanaleve ushtarake dhe atyre teknike me Uashingtonin, por nuk do të shkëmbejë informacione përmes tyre.
“Në dritën e këtyre sulmeve raketore, rreziku i përplasjes ruso-amerikane është shtuar dukshëm”, tha Peskov.
Ai tha se sulmi i ushtrisë amerikane është në favor të grupeve radikale dhe Shtetit Islamik, të cilat operojnë në Siri.
Rusia ka ndërprerë bashkëpunim me SHBA-të, për të shmangur incidentet e mundshme në hapësirën ajrore siriane.
SHBA ndërmori një sulm raketor kundër forcave ushtarake siriane, në shenjë hakmarrjeje ndaj sulmit me helm kimik në Kan Sheikun, qytet nën kontrollin e kryengritësve.
Nga sulmi u vranë të paktën shtatë ushtarë sirianë, ndërsa baza është shkatërruar pothuajse plotësisht.
