Zyrtarë të Policisë bëjnë me dije, se është konfiskuar gjatë 3 muajve të fundit një shumë prej 2 milionë eurove false.
Janë trajtuar 243 raste të falsifikimit të parave në vlerë prej 2 milionë e 140 mijë eurove dhe janë arrestuar 18 persona, të cilët kanë qenë të përfshirë në veprime të tilla të kundërligjshme.
Zëdhënësi i Policisë së Kosovës, Daut Hoxha, deklaroi se raste të tilla të parave të falsifikuara raportohen nga qytetarët dhe nga autoritetet e ndryshme bankare.
“Referuar statistikave gjatë periudhës janar – mars të këtij viti, në luftimin e kësaj dukurie, që ka ndikim edhe në mirëqenien e qytetarëve të Kosovës, polica ka të raportuar 243 raste, derisa vlera e parave të falsifikuara kap shifrën e 2 milionë e 140 mijë euro, derisa janë arrestuar 18 persona”, bënë të ditur Hoxha.
Kartëmonedha e shumë përdorur në tregun e Kosovës, sipas policisë, është bankënota prej 50 euro.
