Kreu i PD-së, Lulzim Basha, ka folur menjëherë pas komunikimit të përjavshëm të kryeministrit Edi Rama, nga çadra, duke e thumbuar këtë të fundit.
Ai e ka akuzuar kryeministrin Rama për lidhje të tij me krimin e organizuar dhe frikën nga zgjedhjet e lira e të ndershme.
“Bota e krimit është e vetmja shpresë për Edi Ramën, që t’i shpëtojë gjykimit të zgjedhjeve. Rama po përpiqet të mbrojë me çdo kusht shtetin e krimit, që ka ngritur dhe me të cilin ka qeverisur gjatë këtyre katër viteve”, tha Basha.
Kreu i opozitës tha se qeveria e Edi Ramës është vetëm në shërbim të krimit dhe aspak në shërbim të qytetarëve dhe të mirëqënies së tyre.
Basha rikonfirmoi edhe një herë kushtin kryesor të zgjidhjes së krizës politike në vend, që është qeveria teknike.
“Kushti ynë i panegociueshëm janë zgjedhjet e lira dhe të ndershme, të cilat nuk mund të organizohen nga një qeveri dhe një kryeministër i lidhur kokë e këmbë me krimin. Qeverisë teknike i duhen vetëm 100 ditë kohë për të shkëputur të gjitha lidhjet e vendit me krimin e organizuar”, tha kreu i PD-së.
Sipas Bashës, shqiptarët nuk janë të ndarë, por më të bashkuar se kurrë më parë dhe po luftojnë çdo ditë e më shumë për lirinë e zgjedhjeve, e cila është njëkohësisht edhe liria e tyre.
