Kreu i Këshillit Evropian, Donald Tusk, zbarkon të hënën në Shkup, e ashtu si zyrtarë të tjerë të lartë të bllokut përpara tij, duket se shkon me porosi të qarta për presidentin Gjorge Ivanov.
BE-ja është pozicionuar hapur pro zgjidhjes së shpejtë të krizës në respektim të Kushtetutës, që do të thotë t’i dorëzohet mandati i krijimit të qeverisë, shumicës së re parlamentare.
Në axhendën e Tuskut do të jetë edhe ngërçi i emigrantëve, një shqetësim i pafashitur plotësisht ky i Bashkimit Evropian, por kriza politike aktuale e Maqedonisë dhe perspektiva evropiane e rajonit do të jenë padyshim pjesë qendrore e bisedimeve mes dy udhëheqësve.
Agjensia e lajmeve “INA” citon njohës të mirë të zhvillimeve në Maqedoni të pohojnë se vizitën e shefit të Këshillit Evropian e shohin si presionin e fundit ndaj Ivanovit për t’i dorëzuar mandatin kreut të LSDM-së, Zoran Zaev.
Profesoresha Tanja Karakamisheva-Jovanovska nuk përjashton skenarin që zyrtari i lartë i bllokut të parashtrojë opsionin e disa sanksioneve të ashpra për disa politikanë nga radhët e VMRO-DPMNE-së dhe ndaj vet kreut të shtetit maqedonas.
Kjo është vizita e tretë e Tuskut brenda dy vitesh në Maqedoni. Gjatë ndalesës së tij të fundit, marsin e 2016-s, zyrtari evropian ishte i fokusuar tek çështja e ngutshme asokohe e refugjatëve dhe emigrantëve nga Lindja e Mesme dhe Afrika. /Koha.net
