Shqipërinë vazhdon ta mbulojë betoni, ndërsa Tirana kryeson kantierin e ndërtimit. Pavarësisht se kryetari i Bashkisë së Tiranës, Erion Veliaj premtoi që nuk do të lejojë të ndërtohet më në kryeqytet, vetëm në tremujorin e katërt të 2016-ës janë dhënë 41 leje ndërtimi në Tiranë, sipas statistikave të publikuara nga INSTAT. Në krahasim me të njëjtën periudhë të një viti më parë, lejet janë katërfishuar. Në tetor-dhjetor të 2015-ës ishin dhënë vetëm 11 leje.
Sipas Monitor.al, në total, gjatë vitit 2016, në Tiranë janë dhënë gjithsej 106 leje ndërtimi, me një rritje prej 18% në raport me vitin e mëparshëm. Gjatë 2015-ës, u dhanë gjithsej 90 leje ndërtimi në kryeqytet. Nga këto, 64 leje u dhanë në tremujorin e dytë të 2015-ës, para se të zhvilloheshin zgjedhjet bashkiake.
Në gjithë Shqipërinë, në tremujorin e katërt janë dhënë 147 leje. Pas Tiranës, në vend të dytë është Elbasani me 34 leje, ndjekur nga Shkodra me 23 dhe Durrësi me 16.
Sipas INSTAT, numri i lejeve të ndërtimit miratuar për ndërtesa rezidente (ku përfshihen ndërtesat për banim) zë 66,7% të numrit gjithsej të lejeve, ndërkaq, numri i lejeve të miratuara për ndërtesa jo rezidente (ku përfshihen ndërtesat për hotele dhe të ngjashme, zyra, tregtare, industriale dhe të tjera) zë 33,3%.
Për gjithë vitin 2016, në Shqipëri u dhanë 455 leje. Nga të dhënat e INSTAT rezulton se pothuajse të gjitha bashkitë e kanë lëshuar dorën, teksa rritja, në raport me një vit më pare, është 172%.
Në Elbasan p.sh.: nga 9 leje në 2015-n, një vit më vonë u dhanë 68 të tilla, në Shkodër nga 12 u dhanë 60, për të njëjtën periudhë. Në Durrës, lejet u rritën nga 30 në 49.
Kukësi mban rekord në drejtimin e kundërt, pasi në dy vjet nuk është dhënë asnjë leje.
