Prokuroria e Tiranës mbylli hetimet dhe dërgoi në gjykatë, ish-drejtorin e ÇEZ-it, Josef Hajcek dhe vartësin e tij, Jan Ivan, nën akuzën e mashtrimit me pasoja të rënda, të kryer në bashkëpunim.
Për të njëjtën histori mashtrimi, për të cilën Prokuroria thotë se u vodhën gati pesë milionë euro, ndodhet nën gjykim, në një tjetër proces penal, edhe ish-administratori i mbledhjes së borxheve të ÇEZ-it, Kastriot Ismailaj, raporton Top Channel.
Prokuroria thotë se dy shtetasit çekë, të cilëve iu është njoftuar akuza përmes letërporosisë, kanë përdorur të dhëna fiktive dhe kanë vjedhur nga ÇEZ-i, shumën prej 649 milionë lekësh. Kjo vlerë i është paguar shoqërisë DIA, dega Shqipëri, për shërbime që nuk janë kryer.
Me detyrën e kryetarit të bordit të drejtorëve, Josef Hajcek, dhe Jan Ivan si anëtar i këtij bordi, kanë patur dijeni për falsifikimin e dokumentacionit të dorëzuar nga i pandehuri tjetër, Kastriot Ismailaj, i cili mbahet në paraburgim prej dy vitesh. Duke bashkëpunuar me njëri-tjetrin, të pandehurit kanë vjedhur kompaninë ÇEZ, e për rrjedhojë edhe shtetin shqiptar, i cili në atë kohë zotëronte aksione të kësaj shoqërie.
Prokuroria e mbështet qëndrimin e saj mbi prova të tilla, sikurse janë: paraqitja e të dhënave të rreme gjatë nënshkrimit të kontratës, paraqitjen e një raporti fiktiv për identifikimin e debitorëve, në një kohë kur shoqëria DIA nuk kishte kryer asnjë proces të tillë.
Vetëm nga paraqitja e këtij raporti, që në fakt ishte një produkt i thjeshtë elektronik mbi të dhënat ekzistuese, janë përfituar 1.5 milionë euro, thotë prokuroja e çështjes, Antoneta Sevdari.
