Ish-ministri i Brendshëm dhe njëherësh kryetar i PS për Tiranën, Saimir Tahiri theksoi sot se LSI po bëhet palë me PD-në për çështjen e zgjedhjeve që do të mbahen për kreun e Bashkisë së Kavajës.
Në një reagim në profilin e tij në Facebook, Tahiri e intepreton qëndrimin e aleatit si sulm ndaj PS dhe afrim me PD-në.
Tahiri tha se deklaratat publike të LSI-së janë destruktive dhe nuk ndihmojnë askënd, aq më pak sipas tij, kthimin e opozites ne normalitetin demokratik.
Tahiri theksoi se PS do të hyjë në zgjedhjet vendore në Kavajë dhe në ato të përgjithshme të 18-qershorit pavarësisht dëshirës së PD-së apo LSI-së.
“Me apo pa LSI, ne do respektojmë të drejtën sovrane të popullit shqiptar për të zgjedhur ofertën më të mirë, në Kavajë në 7 maj dhe në mbarë Shqiperine në 18 qershor”, shkruan Tahiri në Facebook.
Nga ana tjetër, ka ardhur përgjigja e LSI. Nënkryetari i LSI, Luan Rama ka deklaruar se kjo parti nuk është regjistruar për të marrë pjesë në zgjedhjet për Bashkinë e Kavajës. Në një prononcim për mediat, Rama ka sqaruar se LSI nuk mund të bëhet pjesë e një procesi të përgatitur në mënyrë të njëanshme nga PS. “LSI nuk është regjistruar në zgjedhjet për Kavajën sepse mënyra se si është proceduar deri tani për zgjedhjen e kandidaturës ka qenë e njëanshme”, ka thënë Rama. Duke theksuar se LSI ka qenë kundër kandidaturës së mëparshme për Kavajën, asaj të Elvis Roshit, nënkryetari i kësaj partie ka nënvizuar se LSI nuk është konsultuar as për kandidaturën e radhës. “Nuk jemi trajtuar si partner. Dy partnerë konsultohen, bisedojnë dhe vendosin së bashku”, ka thënë Rama, duke shtuar se Kavaja tashmë është një çështje që i përket vetëm PS-së.
Për LSI-në, ka vijuar ai, e rëndësishme është mbajtja e zgjedhjeve të lira e me standarde dhe për këtë ajo do të ketë një angazhim maksimal. Në fund, Rama i është përgjigjur edhe akuzave që vijnë nga partia kryesore e koalicionit qeverisës. “Ne nuk i referohemi çfarë thotë qeveria apo Saimiri, sepse Saimiri para 6 muajsh tha se nuk është e nevojshme ndërhyrja e ushtrisë kundër kanabisit, ndërsa dje qeveria tha se do përfshihet edhe ushtria”, ka shtuar Rama.
