Ministri i Punëve të Brendshme, Besfort Lamallari, mori pjesë në forumin ndërkombëtar “Europa Wachau”, të zhvilluar në Krems të Austrisë, me ftesë të ministrit të Brendshëm austriak, Gerhard Karner, dhe komisionerit europian për Çështjet e Brendshme, Magnus Brunner.
Në fokus të diskutimeve ishte nevoja për një qasje të re europiane në menaxhimin e flukseve migratore, përballë sfidave të sigurisë dhe lëvizjeve të paligjshme që po përballen vendet e Bashkimit Europian dhe rajoni.
Gjatë forumit, Lamallari riafirmoi rolin e Shqipërisë si një partner i besueshëm i sigurisë dhe solidaritetit në adresimin e sfidave të përbashkëta europiane. Ai theksoi angazhimin e vendit tonë në bashkëpunimin me partnerët europianë për forcimin e kontrollit kufitar, luftën kundër migracionit të paligjshëm dhe garantimin e sigurisë rajonale.
Shqipëria tha Lamallari, vijon të japë një kontribut të çmuar në arkitekturën e sigurisë europiane, duke dëshmuar se mbetet një aleate serioze dhe e përgjegjshme në përballimin e krizave që prekin kontinentin.
Forumi “Europa Wachau” konsiderohet një nga platformat më të rëndësishme të dialogut politik dhe strategjik në Europë, ku marrin pjesë liderë politikë, përfaqësues institucionesh europiane dhe vendimmarrës nga vende të ndryshme të kontinentit.
