Takimet në terren në njësitë administrative të Qarkut Tiranë kanë vijuar këtë të enjte në Baldushk, ku Prefekti i Qarkut Tiranë, Shkëlqim Hajdari, zhvilloi një takim me administratën vendore dhe përfaqësues të komunitetit.
Gjatë diskutimeve u evidentuan problematikat kryesore me të cilat përballen banorët, mes tyre mungesa e mjeteve dhe pajisjeve për reagim ndaj zjarreve, përmbytjeve dhe pastrimit të mbetjeve, procesi i papërfunduar i legalizimeve, si dhe nevoja për asfaltimin dhe hapjen e rrugëve që lidhin fshatrat dhe zonat pyjore.
Një tjetër shqetësim i ngritur ishte nevoja për pastrimin e rezervuarëve dhe pajisjen e tyre me shkarkues, problematikë për të cilën u tha se do të merren masa të menjëhershme ndërhyrëse.
Prefekti Hajdari theksoi se problematikat e ngritura do të adresohen në bashkëpunim me institucionet kompetente, me synim përmirësimin e shërbimeve ndaj komunitetit.
