Kryetari i PD-së Sali Berisha në fjalën e tij sot më 17 prill përpara demokratëve në protestë tha se Partia demokratike është shpresa e vetme për Shqipërinë.
Kryedemokrati deklaroi se çmimi i naftës në vendin tonë ka taksat më të lartat në botë.
“Kjo qeveri është e korruptuar deri në palcë. Ne kemi zhvilluar protestat më të jashtëzakonshme qytetare. Mijëra të rinj u përballën me regjimin, me plumbat e gomës, por se triumfuan. Jemi shpresa e vetme për Shqipërinë. Partia Demokratike ka qenë dhe mbetet në mbrojtje të qytetarëve shqiptarë, kundër vjedhjes grabitqare të Ramës në litrin e naftës. Sot shqiptarët kanë rrogat dhe pensionet më të ulëta në rajon dhe në Europë. Taksa mbi naftën është më e larta në botë”, tha Berisha.
Tha se në protestën kundër rritjes së çmimit të naftës nuk kishte shumë qytetarë, për shkak të frikës. Kërkoi që të përgjysmohet taksa e çmimit të naftës.
Në kryengritjen paqësore të kaluar, dhjetëra mijëra qytetarë guximtarë u përballën në rrugët dhe sheshet e Tiranës si të pamposhtur për orë të tëra, dhëmb për dhëmb me regjimin. U përballën me ujin e helmuar, gazin lotsjellës, shkopinjtë dhe plumbat e gomës, por triumfuan. Por që ne jemi shpresa e vetme për Shqipërinë u bë akoma më e qartë si drita e diellit të nesërmen e protestës tonë të kaluar. Një protestë e thirrur nga njerëz të nderuar, nga shoqëria civile në mbrojtje të interesave të qytetarëve shqiptarë kundrejt rritjes së madhe të çmimit të naftës, në orën e thirrur u paraqitën vetëm dhjetëra qytetarë. Absolutisht çdo qytetar, pavarësisht nga bindjet e tij, është prekur nga rritja e çmimit të naftës. Po pse nuk pati pjesëmarrje në një protestë të thirrur nga shoqëria civile?
A ka pakënaqësi midis shqiptarëve? Po, ka pakënaqësi dhe të madhe shumë. A janë çmimet e naftës në Shqipëri më të lartat në Europë? Po, ato janë ndër më të lartat në Europë dhe në botë. A janë rrogat dhe pensionet e shqiptarëve më të ulëtat në rajon? Po, ato janë më të ulëtat në rajonin tonë. A është taksa e Ramës mbi litrin e naftës taksa më e lartë në botë? Po, këtë askush nuk e do, por askush nuk e mohon. Atëherë përgjigjja është ajo që opozita e ka ngritur në mënyrë të përsëritur vitet e fundit dhe që banalistët, kriptoramistët e fshehin nga ju. E fshehin nga shqiptarët.
Shkaku i asaj proteste është frika, frika, të cilën ka ngulur gjer në palcë të shqiptarëve. Njerëzit nga frika nuk guxuan të dalin në protesta për të mbrojtur interesat e tyre. Edi Rama me sistemin e patronazhistëve, me presionin mbi punonjësit dhe familjet e tyre, me arrestimin e dhjetëra mijëra qytetarëve për faturat e dritave dhe ujit, me diferencimin politik të tipit të një pushtuesi, me propagandën e tij toksike që shpërndahet nga mediat kryesore të kontrolluara prej tij, ka instaluar njësoj si etërit e tij të mëparshëm frikën tek shqiptarët. Duke i kërcënuar ata me vendin e punës, me falimentimin e biznesit, me falimentimin e fermave, shkurt, duke i kërcënuar ata me kafshatën e gojës“, tha ai.
Akuzoi Ramën se ka krijuar narko-shtet dhe se kontrollon shumicën e medieve.
“Edi Rama ka krijuar narko-shtet. Këtu u bllokua Tik Tok-u, ndryshe nga Hungaria ku opozita kishte hapësirë dhe arsyeja ishte politike, sepse aty dilnin të palarat e qeverisë. Kjo qeveri kontrollon shumicën e medieve dhe rrjeteve sociale”, deklaroi kryedemokrati.
Berisha tha se fundi i Ramës do të jetë para gjykatës, duke pasur parasysh thirrjen e kryeministrit Rama në gjykatë për çështjen “Partizani”. Berisha e sfidoi Ramën, duke i thënë se nëse nuk paraqitet dot në gjykatë, të dalë në një panel televiziv në debat.
“Fundi yt do të jetë para gjykatës. Ne si opoziotë ndodhemi në kushte shumë të vështira dhe po bëjmë sakrifica tepër të mëdha. Po bëjmë ndoshta sakrificën më të madhe të ndonjë opozite në Europë dhe po qëndrojmë të pamposhtur në interes të qytetarëve shqiptarë.
Në gjyq do të jetë përballja e shekullit. Nëse nuk ta mban të vish në gjykatë, të sfidoj dhe në formë mëshirë, zgjidh studion televizive dhe hajde në debat që të them se çfarë hajduti je. Edi Rama, jep dorëheqjen”, tha ai.
Hodhi akuza në drejtim të qeverisë, duke thënë se po tentohet të asgjësohet opozita.
“Na izoluan ndërkombëtarisht me anë të mafies korruptive. Tentoi të në asgjësojë. Por ne sot jemi më të fuqishëm se kurrë. Sot kemi 7 rezoluta, që denoncojnë narko shtetin e Edi Ramës”.
Kërkoi sërish qeveri teknike si shpëtim për Shqipërinë.
“Shqipërisë sot i duhet qeveri teknike që të dalë nga kriza. Vendi nuk shpëtohet nga një njeri i vetëm dhe as nga një forcë e vetme politike dhe as nga miqtë tanë ndërkombëtarë. Shqipërinë e shpëton vetëm bashkimi i opozitës, intelektualëve dhe qytetarëve që besojnë se vota e lirë është vendimtare për lirinë e një populli. Kjo ditë për lirinë e vendit ka ardhur, ajo ditë ka ardhur. Ne nuk jemi thjesht opozita, jemi shpresa e vetme e Shqipërisë dhe nuk dorëzohemi kurrë’, tha Berisha.
