Kryetarja e Bashkisë së Durrësit, Emiriana Sako, është kallëzuar sot në SPAK pas situatës me përmbytjet në qytet.
Anëtarja e Këshillit Kombëtar të Partisë Demokratike, Ilirjana Kuçana, ka depozituar sot në SPAK, një kallëzim penal ndaj kryetares së Bashkisë Durrës, Emirjana Sako, si dhe ndaj institucioneve të tjera, për veprën penale “Shpërdorim i detyrës në bashkëpunim”, të parashikuar nga neni 248 i Kodit Penal.
Sipas kallëzimit, i cili përfshin gjithashtu Ministrinë e Bujqësisë dhe Zhvillimit Rural dhe Drejtorinë e Ujitjes dhe Kullimit Durrës, dyshohet se personat dhe institucionet e përfshira mund të kenë shpërdoruar fonde publike dhe detyra të tjera zyrtare, duke kontribuar në përkeqësimin e situatës së përmbytjeve në qytetin e Durrësit.
Kallëzimi thekson se hetimi mund të zbulojë edhe veprime të tjera penale të kryera në bashkëpunim nga personat dhe institucionet e përfshira. Dokumenti ligjor referon Kushtetutën e Republikës së Shqipërisë, Kodin Penal dhe ligjet për vetëqeverisjen vendore dhe administrimin e ujitjes dhe të kullimit.
Sipas Ilrijana Kuçanës, është keqmenaxhimi i situatës nga institucioneve ajo që ka ccuar në krijimin e problematikave të tilla me pasoja të mëdha.
“Çështja ka kaluar për mos kompetencë në Prokurorinë e Durrësit, e cila e ka “larë” me shishen e verës së Ergys Agasit 33 mijë euro dhe deri më sot unë nuk jam thirrur dhe nuk kam informacion se çfarë ka ndodhur me përmbytjen e 2025. Rikthehemi tek përmbytja e 2026. Kemi një investim rreth 19 mln euro për hidrovorin ku vetë zonja Sako në statusin e saj, thotë që Durrësi nuk do të ketë më probleme me përmbytje. Jo vetëm që ka 3 ditë nën ujë, por keni parë që këta kanë arritur të përmbysin edhe Gjirokastrën, E kuptoni se çfarë bande e strukturuar kriminale janë. I bëj thirrje drejtuesit të ri të SPAK Klodian Barahos të merret personalisht dhe seriozisht me këtë kallëzim, pasi bëhet fjalë për 400 mijë banorë të Durrësit dhe jo vetëm, pasi janë përmbytur edhe zona të tjera. Ju siguroj se nuk është përmbytje dhe çështje Zoti. Kam ardhur këtu të bëj përgjegjës atë që mendon se është zoti i shqiptarëve, Rama që në shërbim ka vënë djajtë e tij”, tha ajo.
