Sot, 5 dhjetor, në Ditën Ndërkombëtare të Vullnetarizmit, Presidenti i Republikës, Bajram Begaj, ka shprehur mirënjohjen e tij për të gjithë ata që kontribuojnë pa kushte në shërbim të komunitetit.
Përmes një mesazhi në rrjetet sociale, Kreu i Shtetit vë në dukje rolin thelbësor të vullnetarëve në forcimin e kohezionit social dhe në mbajtjen gjallë të vlerave të solidaritetit.
“Ju jeni shtylla morale që mban gjallë angazhimin vullnetar social dhe solidaritetin”, shkruan Presidenti, duke theksuar se kjo ditë kujton forcën e një shoqërie të ngritur mbi ndihmën dhe përkushtimin, vlera që ai i konsideron pjesë të karakterit kombëtar.
Begaj shpreh respektin e tij për çdo nismë që fuqizon komunitetin dhe mbështet qytetarët, duke i inkurajuar vullnetarët të vijojnë misionin e tyre me kurajë.
“Shqipëria ka nevojë për zemrën dhe kontributin tuaj sot dhe çdo ditë”, përfundon Begaj në mesazhin e tij.
Kjo ditë zhvillohet për të njohur dhe promovuar punën e palodhshme, jo vetëm të vullnetarëve të OKB-së, por edhe të vullnetarëve anembanë globit. Respektimi ndërkombëtar u mandatua nga Asambleja e Përgjithshme e Kombeve të Bashkuara (OKB) në vitin 1985. Kjo ditë festohet në 80 vende në botë.
