Deputeti i LDK, Armend Zemaj u përfshi në një incident me një qytetar teksa po intervistohej nga një media. Ngjarja është denoncuar nga gazetari në rrjetet sociale, i cili tha se pamjet janë sekuestruar nga policia.
Për incidentin ka reaguar vetë deputeti Zemaj i cili ka kërkuar falje publike por shton se ai u provokua dhe u fye verbalisht nga qytetari.
“Sot gjatë një interviste publike ndodhi një situatë e pakëndshme, për të cilën ndjej keqardhje të sinqertë. Një qytetar, nuk e di a ishte e rastit apo me qellim të caktuar, këtë do e vërtetojnë policia, më ofendoi dhe më provokoi verbalisht me fjalë të papranueshme, para medias dhe gazetarit që ishim në intervistë.
Në atë moment reagova në mënyrë të vetëmbrojtjes në afekt, gjë e cila nuk përfaqëson as bindjet e mia personale, as parimet që unë përfaqësoj si deputet dhe si anëtar i Lidhjes Demokratike të Kosovës”, shkruan në mesazhin e tij deputeti i LDK Adem Zemaj.
Ai ka kërkuar falje publike për këtë, duke thënë se është dashur ta ruajë qetësinë.
Policia e Kosovës në një njoftim zyrtar ka konfirmuar se sot rreth orës 15:00 në sheshin qendror të Prishtinës ka ndodhur një incident fizik
Zëdhënësi i Policisë së Kosovës, Enis Pllana, ka thënë se deputeti Zemaj dhe qytetari janë duke u intervistuar në polici për rastin.
“Sot rreth orës 15:00 është pranuar informata për një konflikt fizik në sheshin Ibrahim Rugova në Prishtinë. Lidhur me incidentin palët e përfshira janë duke u intervistuar në polici. Për detaje shtesë do t’ju njoftojmë me kohë”, thotë policia.
