Një 44-vjeçare, Zyhra Korra nga Durrësi është arrestuar pasi akuzohet se ka shantazhuar një grua 39-vjeçare nga Saranda nëpërmjet rrjeteve sociale.
Sipas kallëzimit, e dyshuara i mori fillimisht 5000 euro viktimës, ndërsa vijonte ta kërcënonte për t’i marrë edhe 50 000 euro të tjera.
Rasti i është referuar Prokurorisë pranë Gjykatës së Shkallës së Parë Sarandë, ku po kryhen veprime të mëtejshme ligjore.
44-vjeçarja do të hetohet për veprën penale “Shtërngim me anë të kanosjes ose dhunës për dhënie pasurie”.
Njoftimi i policisë:
Sarandë
Shantazhonte dhe kërcënonte një shtetase në rrjetet sociale, i mori 5000 euro dhe i kërkonte edhe 50 000 euro të tjera, vihet në pranga 44-vjeçarja, Zyhra Korra.
Në vijim të veprimeve hetimore, lidhur me kallëzimin e një shtetaseje, e cila kishte deklaruar se i ishte marrë një shumë parash nëpërmjet shantazhit dhe kërcënimit, specialistët e Seksionit për Hetimin e Krimeve ndaj Pasurisë, nën drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Sarandë, bënë të mundur ndalimin e autores së dyshuar të shpallur në kërkim, shtetases:
Z. H., 44 vjeçe, banuese në Durrës, për veprën penale “Shtërngim me anë të kanosjes ose dhunës për dhënie pasurie”.
Kjo shtetase dyshohet se, përmes shantazhit dhe kërcënimeve në rrjetet sociale, i kishte marrë një 39-vjeçareje nga Saranda shumën prej 5000 eurosh dhe vijonte ta kërcënonte për t’i marrë edhe 50 000 euro të tjera.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Sarandë, për veprime të mëtejshme.
