Mjekët italianë kanë përcaktuar shkakun e vdekjes së 3-vjeçarit Brian Spahiu në klinikën e mjekut Roland Xhaxho dhe i kanë përcjellë prokurorisë shqiptare një akt ekspertizë voluminoze prej 200 faqesh.
Lajmi konfirmohet nga prokuroria e Tiranës, përmes një kërkese për të drejtën e informimit dhe aktualisht prokurorja e çështjes Alma Felaj është duke analizuar të gjitha detajet e dosjes për të përfunduar hetimet ndaj mjekut Xhaxho dhe personave të tjerë të dyshuar. Lidhur me detajet e aktekspertizës, prokuroria është tejet e rezervuar, me argumentin se mund të dëmtojë hetimin, por konfirmoi se do tu vihet në dispozicion palëve sapo të konkludojë me hetimet.
Edhe familjarët e Spahiut mësohet se kanë kërkuar informacion lidhur me ecurinë e hetimeve, por edhe të njihej me konkluzionet e aktit të ekspertimit të ardhur nga Italia, përderisa më herët kanë ngritur dyshime lidhur me hetimet që po kryheshin nga prokuroria për të hedhur dritë mbi vdekjen e fëmijës së tyre. Brian Spahiu humbi jetën më 1 tetor 2023 në spitalin shtetëror, pasi më herët në klinikën e mjekut Roland Xhaxho kishte bërë ndërhyrje në dhëmbë. Sipas ekspertizës së parë të kryer nga Instituti i mjekësisë ligjore thuhet se anestezia, ishte shkak i vdekjes së 3-vjeçarit.
“Shkaku i vdekjes se shtetasit Brian Spahiu ka qene dhënia e lendes anestetike qe ka sjelle vuajtjen qelizore te thelle me mekanizmin e insuficiencës multiorganore te parikthyeshme”, thuhet në aktin e Institutit të mjekësisë ligjore. Por, pavarësisht këtij konkluzioni, Prokuroria e Tiranës kërkoi një ekspertizë të dytë, me argumentin se akti i parë ishte i paplotë, konkluzioni ishte i pasaktë dhe se mungonin ekspertët e fushës për të dhënë përgjigje për të gjitha pyetjet.
