Muzika korçare humbi sot një nga zërat e saj më të dashur dhe autentik. Astrit Koçibelli, një nga figurat më përfaqësuese të serenatës korçare, është ndarë nga jeta. Lajmi është bërë i ditur nga Qendra e Artit dhe Kulturës Korçë, përmes një postimi prekës në rrjetet sociale.
“Korça humbi sot një nga serenatistët e saj më të dashur. Me zërin dhe shpirtin e tij, Astriti u bë pjesë e historisë së serenatës korçare. Këngët e tij do të vazhdojnë të jetojnë si kujtim i gjallë i dashurisë dhe artit të qytetit tonë,” – shkruhet në njoftim.
Astrit Koçibelli përfaqësonte jo vetëm një brez të artë të muzikës korçare, por edhe shpirtin e vërtetë të serenatës, si një formë artistike e ngjizur në rrugicat e qytetit, e mbushur me emocione, mall dhe dashuri.
