Një fluturim i Delta Airlines me destinacion Amsterdamin u ndërpre nga turbulenca të forta që plagosën dhjetëra pasagjerë.
Fluturimi, i cili ishte nisur nga Salt Lake City, u detyrua të bënte një ulje emergjente në Aeroportin Ndërkombëtar të Minneapolis-St. Paul pasi kapiteni vendosi të devijonte vetëm dy orë pas ngritjes dhe shumë kohë para se të përfundonte udhëtimin nëntëorësh. Airbus A330-900 u ul në mënyrë të sigurt.
Personeli mjekësor nxitoi në aeroport për t’u ofruar ndihmën e parë pasagjerëve dhe ekuipazhit, ndërsa 25 persona u dërguan në spitalet e zonës për trajtim. Kompania tha në një deklaratë se po punonte me pasagjerët për të përmbushur nevojat e tyre të menjëhershme.
Në total, 275 pasagjerë dhe 13 anëtarë të ekuipazhit ishin në bord të fluturimit, sipas BBC-së. Sipas të dhënave nga Bordi Kombëtar i Sigurisë së Transportit të SHBA-së, që nga viti 2009 janë regjistruar 207 lëndime të rënda për shkak të turbulencave, pra incidente që kërkojnë shtrim në spital për më shumë se 48 orë.
Vlerësohet se çdo vit ndodhin afërsisht 5,000 incidente me turbulenca të rënda ose më të rënda, midis më shumë se 35 milionë fluturimeve në të gjithë botën.
