Një 42-vjeçar është arrestuar në flagrancë në fshatin Kryebushat të Shkodrës, gjatë një operacioni policor të koduar “Precedenti”.
Gjatë kontrollit, policia i gjeti armë zjarri, një silenciator, municion luftarak, 110 kapsolla detonatore dhe doza kokaine.
I dyshuari rezulton me precedentë penalë për armëmbajtje pa leje. Materialet u referuan Prokurorisë për veprime të mëtejshme.
Njoftimi i policisë:
Shkodër/Finalizohet operacioni policor i koduar “Precedenti”.
Sekuestrohen 110 kapsolla detonatore, 2 armë zjarri pistoleta, 1 silenciator, municion luftarak dhe doza Kokaine, në posedim të një shtetasi me precedent për armëmbajtje pa leje.
Arrestohet në flagrancë 42-vjeçari.
Si rezultat i administrimit të shpejtë të informacioneve të siguruara në rrugë operative, rreth veprimtarive kriminale të një shtetasi, banues në fshatin Kryebushat, Seksioni për Hetimin e Narkotikëve, në bashkëpunim me Seksionin Operacional, finalizoi operacionin policor të koduar “Precedenti”.
Gjatë operacionit u arrestua në flagrancë, në fshatin Kryebushat, shtetasi Gj. M., 42 vjeç.
Nga kontrolli në automjet, iu gjet një sasi lënde narkotike Kokainë, e ndarë në doza, ndërsa nga kontrolli në banesë iu gjetën 110 kapsolla detonatore, 2 armë zjarri pistoleta, 1 silenciator dhe municion luftarak. Këto u sekuestruan me cilësinë e provës materiale, së bashku me automjetin dhe celularin e të arrestuarit.
Materialet procedurale iu referuan Prokurorisë së Shkodrës, për veprime të mëtejshme.
