Temperaturat e larta të ditëve të fundit kanë krijuar terren të përshtatshëm për shumimin e baktereve, duke sjellë rritje të ndjeshme të rasteve me helmime ushqimore në qytetin e Elbasanit. Mjekët bëjnë thirrje për kujdes të veçantë, sidomos ndaj mishit, produkteve të bulmetit, vezëve, ujit të pijshëm, si dhe frutave dhe perimeve.
Dr. Ergys Mici, shef i Urgjencës në Elbasan, theksoi se po vërehet një fluks i lartë pacientësh, veçanërisht fëmijë, të cilët paraqiten me simptoma si të vjella, diare dhe temperaturë të lartë. Sipas tij, ushqimet e kontaminuara janë shkaku kryesor, ndërsa fruta si shalqiri dhe qershitë, kur konsumohen të prera ose të ndenjura, përbëjnë rrezik më të madh.
Përveç ushqimeve, mjekët paralajmërojnë edhe për rrezikun që vjen nga përdorimi i pakujdesshëm i pesticideve nga fermerët. Dr. Mici përmendi rastin e një fëmije që u helmua pas kontaktit me pemët e spërkatura.
Një tjetër shqetësim lidhet me ujin e pijshëm. Sipas Enver Shkurti, Kryeinspektor i ISHSH Elbasan, në disa zona rurale burimet e ujit nuk janë të monitoruara apo të trajtuara me klor, duke rritur rrezikun për infeksione.
Në Urgjencën e Spitalit të Elbasanit aktualisht kryhen mesatarisht 100-150 vizita në ditë, ku helmimet ushqimore renditen ndër rastet më të shpeshta.
Këshilla për parandalimin e helmimeve ushqimore:
Mos lini ushqimin jashtë frigoriferit për më shumë se 1-2 orë.
Lani me kujdes frutat dhe perimet para konsumit.
Shmangni shalqirin dhe pjeprin që janë prerë më parë.
Përdorni vetëm ujë të kontrolluar për pirje dhe gatim.
Ruani dhe transportoni ushqimet me kujdes gjatë udhëtimeve dhe në plazh.
