Policia italiane ka finalizuar një operacion të madh antidrogë duke çuar në arrestimin e 11 personave, mes tyre edhe një shqiptar 48-vjeçar, Elidon Buxheli, i dyshuar si organizatori dhe drejtuesi i një grupi kriminal që merrej me trafikim dhe shpërndarje të lëndëve narkotike në jug të Italisë.
Mediat italiane raportojnë se rrjeti kriminal, i cili vepronte kryesisht në zonën e Garganos në Pulia, përbëhej kryesisht nga shtetas italianë, por drejtohej nga Buxheli në bashkëpunim me dy italianë të tjerë: Di Nauta dhe Cursio. Në një episod të dokumentuar, grupi kishte transportuar 13 kilogramë hashash nga Lesina në San Benedetto del Tronto, ndërsa dyshohet se Buxheli ka shpërndarë personalisht sasi të pacaktuara kokaine nga Lesina në Cerignola.
Hetuesit italianë theksojnë se Buxheli, i njohur me pseudonimin “Nano Malefico” për shkak të shtatit të tij dhe sjelljes paranojake, ka vepruar si një “broker” i paligjshëm, duke menaxhuar furnizimin dhe shpërndarjen e drogës. Ai lëvizte me tre makina të regjistruara në emra të tjerë dhe komunikonte vetëm përmes WhatsApp-it, duke shmangur çdo kontakt të drejtpërdrejtë apo biseda të zgjatura.
Sipas dosjes prej 100 faqesh, Buxheli ka mbajtur lidhje të ngushta me Cursio dhe Sacco, me të cilët ndante një banesë në rrugën Santa Maria në Campomarino, ku ndodhej në arrest shtëpie që nga janari 2024. Banesa përdorej si pikë logjistike për shpërndarjen e drogës.
Figurë shumë e kujdesshme dhe e dyshimtë, ai shmangte çdo lëvizje të pa verifikuar dhe tregonte shenja të qarta tensioni edhe gjatë bisedave të zakonshme, në rast se dyshonte për ndonjë përgjim apo infiltrues.
Operacioni ka çmontuar një strukturë të mirëorganizuar kriminale që furnizonte tregjet italiane me hashash dhe kokainë nga brigjet e Adriatikut.
