Bashkëpunëtori i drejtësisë Artan Tafani, në një rrëfim të gjatë në Gjykatën e Posaçme Kundër Korrupsionit dhe Krimit të Organizuar, ka treguar me hollësi se si kreu vrasjen me pagesë të Selim Çajupit në qytetin e Tepelenës.
Sipas Tafanit, krimi u organizua nga grupi i Laert Haxhiut, për llogari të një personi në Greqi.
Ai rrëfeu se ndodhej në Vlorë me familjen, kur Lulzim Arapi e kontaktoi urgjentisht duke i kërkuar të nisej menjëherë drejt Lushnjës.
“Me thanë të nxitoja se po na kërkonte ‘shoku’ për Laertin, por asnjeri nuk e përmendte me emër. Hodha naftë në emër të Lulzimit tek karburanti i Taullahut dhe u nisa për Elbasan,” tha Tafani.
Ai tregon se më pas, së bashku me Laertin dhe të tjerët, kanë shkuar në Sarandë, ku Laerti ishte shoqëruar nga disa vajza. Në bisedat e atyshme rifilloi diskutimi për “punën në Tepelenë”, që sipas Tafanit, ishte një atentat ndaj një personi që kishte një dyqan në qytet dhe që do kryhej për nder të një miku të Laertit në Greqi.
Dita e nesërme Tafani bashkë me Ligorin udhëtuan drejt Tepelenës përmes Qafë-Muzinës.
“I ramë nga Qafa. Kur mbërritëm, pamë viktimën tek dyqani. Më tha Ligori: ‘Ky është’. Më pas më tregoi shtëpinë e tij dhe rrugën nga mund të binte në këmbë,” tha Tafani.
Pas kqyrjes së vendit ku do të kryenin atentatin në Tepelenë, u kthyen sërish në Sarandë për të finalizuar detajet e planit. Sipas dëshmisë, makinat që do të përdornin për të shkuar në Tepelenë u morën nga vajzat që kishin ardhur me Laertin, për të shmangur gjurmët.
Në ditën e atentatit, Tafani dhe Ligori qëndruan në lagjen e shënjestrës. Ai shpjegon se komunikimi u bë përmes aplikacionit të enkriptuar “Signal”, duke përdorur telefona të blerë posaçërisht.
Tafani rrëfen se ndërsa Laerti dhe Erisiano u kthyen në Tiranë, ai dhe Ligori mbetën për të ndjekur shënjestrën.
“Ne u nisëm me Lan (Ligori) në një rrugë që del mu te lagja atij. Ligori shkoi ta ruante shënjestrën, unë ndenja në lagje. Për këtë rast folëm në Signal, kishim blerë cel të ri.”
“Po flisja që të dija kur do nisej ai, kur do mbyllte dyqanin. Si përfundim më thotë: ‘Iku ai, e mbylli dyqanin’. Si duket Ligorit i kishte shpëtuar, dhe më tha: ‘Po vij lart’. Unë u afrova afër pallatit.”
Ekzekutimi ndodhi pak çaste më vonë:
“Pasi shkova te pallati, po rrija ngjitur me hyrjen dhe dëgjova një makinë si Benz-i që kishte ai. Isha ballë për ballë me të, kisha maskë kovidi edhe një kapele. Po më shikonte dhe pati si dyshim. U fut në hyrje të pallatit, ai u ngjit kat i parë, kat i dytë. Unë isha nga mbrapa tij.”
“Ishte qeros dhe unë dija dhe rrobat që kishte veshur atë ditë – të kuqe. Aty e qëllova nga mbrapa. Tri herë e shkrepa, e qëllova. Një herë në shpatull dhe dy herë të tjera, por s’e di ku e kapi.”
Më pas Tafani ka rrëfyer dhe planin e arratisjes i cili u komplikua pasi ngatërroi rrugicën të dilte nga Tepelana.
“Ika me vrap për nga burgu i Bënçës. Rashë në ca ferra aty, si jashtë qytetit. Armën e kisha me vete, Zastava, ose Beretta e vogël, me silenciator. S’po gjeja rrugicën që të dilja. Sipas planit duhej të dilja te lumi Vjosë, ku do vinte Ligori.”
Artan Tafani rrëfen se për disa orë kishte qëndruar i fshehur poshtë një shkëmbi ndërsa partneri i tij në vrasje, Ligori, ishte zhdukur dhe kishte fikur telefonin.
“Ligorin e takova mas 1–2 orësh te shtëpia e xhaxhait të Erisianit. Sipas planit që kishim bërë me Laertin, do na priste xhaxhai i Erisianit. Ligori fiku celin. Unë u fsheha në një shkëmb, kisha frikë. Makinat e policisë vinin vërdallë. Unë e kisha për herë të parë,”- deklaroi Tafani në sallën e GJKKO-së.
Ai shtoi se më pas mundi ntë shkonte te shtëpia e xhaxhait të Erisianit, ku Ligori u shfaq i çjerrë nga duart.
“Te shtëpia erdhi dhe Ligori më pas, i çjerrë nga duart, si duket kishte rënë dhe ai në ferra.”
Laert Haxhiu, sipas dëshmisë, u zemërua me mënyrën se si u menaxhua faza pas vrasjes, duke akuzuar Ligorin se kishte lënë Tafanin në rrezik.
“Laerti u acarua me Ligorin. Më tha mua: ‘Si të la ai vetëm? Ty do ja tregoj unë atij’.”
Më pas Tafani tha se u krye eliminimi i çdo prove që mund t’i implikonte në ngjarje. Sipas tij, e gjithë skema ishte udhëzuar paraprakisht nga Laert Haxhiu, i konsideruar si kreu i grupit kriminal.
“Laerti na kishte thënë si të vepronim me armët, rrobat, telefonat. Arma përfundoi në Vjosë, rrobat i dogjëm në një fuçi”, tha ai.
Pas shkatërrimit të provave, grupi ka ndjekur një rrugë malore nga Memaliaj, duke zbritur më pas në një urë ku hipën në një furgon të rastësishëm për t’u larguar pa rënë në sy.
Rrugës për në Tiranë, Laerti urdhëroi që Ligori të shkëputej nga grupi dhe të shkonte drejt Korçës. Ndarja ndodhi në klubin e shoferëve në periferi të Tiranës, ku Tafani rrëfen:
“Unë ika me Laertin në një hotel në Astir. Aty ishte dhe Lulzim Arapi.”
Në hotel, ndonëse vrasja ishte kryer, komunikimi i Tafanit me një të afërm përmes thirrjes telefonike u konsiderua si shkelje e rëndë nga Laerti:
“Më bërtiti pse mora atë xhaxhain në celular dhe jo në ËhatsApp. Më shau, më ofendoi. Me të nuk bëhej asnjë gabim, se e lëshonte gojën menjëherë.”
Sipas dëshmisë së Tafanit, pagesa për vrasjen ishte 25 mijë euro për secilin. Por vetëm ai mori pjesën e tij një javë më vonë. Ligori, siç deklaron Tafani, nuk mori asgjë:“Laerti nuk ia dha. Nuk i fali asgjë.”
