Zjarri që përfshiu një sipërfaqe të madhe të pyllit të Darëzezës ditën e djeshme është riaktivizuar sërish këtë të diel, duke përkeqësuar situatën në këtë ekonomi pyjore.
Sipas Ministrisë së Mbrojtjes, aktualisht në terren ndodhen 7 automjete zjarrfikëse me 40 efektivë të MZSH-së, një buldozer dhe një fadromë. Megjithatë, për shkak të terrenit ranor dhe përmasave të mëdha që ka marrë zjarri, flakët nuk janë vendosur ende nën kontroll.
Ministria njoftoi se rreth orës 14:00 vatra e zjarrit u përhap edhe më tej, duke e bërë të pamundur ndërhyrjen me mjete tokësore. Në koordinim me Qendrën e Bashkuar Operacionale (QBO), është aktivizuar edhe ndërhyrja nga ajri me një helikopter tip Cougar i Forcës Ajrore.
Deri tani, sipërfaqja e djegur vlerësohet rreth 10 hektarë, ndërsa era e fortë po ndihmon përhapjen e zjarrit drejt pjesës veriore të pyllit. Autoritetet mbeten në gatishmëri për të parandaluar përhapjen e mëtejshme të flakëve.
