Është dënuar me 20 vjet burg, Joel Le Scouarnec, ish-kirurgu francez që ka pranuar se ka abuzuar seksualisht me qindra pacientë. Ai ka abuzuar kryesisht me fëmijë, midis viteve 1989 dhe 2014, për çka mori dënimin maksimal.
Le Scouarnec kishte pranuar akuzat në muajin mars. Gjyqtarja e rastit, Aude Burési tha se gjykata kishte marrë parasysh faktin se ish-kirurgu kishte kërkuar veçanërisht viktima të sëmura, të pambrojtura dhe të paaftë, transmeton BBC.
“Të mendoj se një ditë ai mund të ecë në rrugë, të shohë njerëz – kjo më shqetëson. Ne [viktimat] nuk kemi më një jetë normale, ndërsa ata i kthejnë atij atë jetë, dhe kjo më neverit”, kishte thënë Amélie Lévêque, një nga viktimat e tij, përcjell RTKlive.
“Njëzet vjet janë pak krahasuar me numrin e viktimave në këtë gjyq. Është koha që ligji të ndryshojë që të mund të kemi dënime më të përshtatshme”, tha Francesca Satta, avokate e disa viktimave.
Le Scouarnec, 74 vjeç, është quajtur pedofili më i pa ngopur në Francë. Ai është tashmë në burg pasi është dënuar në vitin 2020 me 15 vjet për përdhunimin dhe sulmin seksual ndaj katër fëmijëve, përfshirë dy nga mbesat e tij.
Ish-mjeku ka qenë në gjyq në Bretanjë që nga fundi i shkurtit. Gjatë kësaj periudhe, dhjetëra viktima të tij kanë dëshmuar, duke treguar se si abuzimi që ata kanë përjetuar si fëmijë ka formuar jetën e tyre.
Në mars, Le Scouarnec pranoi se kishte abuzuar seksualisht me të gjitha 299 viktimat, shumë prej të cilave ishin nën anestezi ose po zgjoheshin pas operacioneve. Ai mbante ditarë në të cilat përshkruante sulmet në detaje grafike, gjë që i lejoi policisë të gjente viktimat e tij – shumë prej të cilave nuk kishin kujtuar abuzimin që kishin përjetuar gjatë kujdesit të Le Scouarnec.
“Nuk mund ta shoh më veten njësoj sepse jam një pedofil dhe përdhunues fëmijësh. Shumë gjëra janë thënë. Nuk i kujtoj domosdoshmërisht të gjitha tani. Pa dyshim që do të më kujtohen kur të jem në qelinë time, por ajo që kam dëgjuar [në gjykatë] është vuajtja për të cilën jam përgjegjës”, tha Le Scouarnec gjatë deklaratave të tij të fundit në gjykatë javën e kaluar.
