Në festën e fitores së 11 majit të organizuar me 186 kandidatët dhe deputetët aktualë, kryesocialisti Rama e cilësoi mandatin e katërt një përgjegjësi historike. Ai theksoi se PS është ngjitur aq lart sa askush nuk e ka besuar, ndërsa opozitën e cilësoi si një humbëse kronike.
“Fitoret na duhen për të përmbushur misionin historik që kemi. Për të ndryshuar përgjithnjë Shqipërinë, duke zhvilluar ekonominë, garantuar drejtësinë, përmirësuar arsimin dhe shëndetësinë, forcuar sigurinë, rritur reputacionin ndërkombëtar, të atdheut tonë dhe bërë histori në anëtarësimin e vendit tonë në BE brenda kësaj dekade”.
“Duhet ta nisim nga vetja për ta ndarë mendjen si duhet mbi disa gjëra që duhet parë ndryshe dhe duhen bërë ndryshe, në nivelin e udhëheqjes së partisë, të grupit parlamentar, të qeverisë. Do ta përdorim fuqinë e jashtëzakonshme të mandatit të katërt në radhë të parë si një fuqi të madhe vetëkorrigjuese. Mandati i katërt duhet të matet me barrën e stërmadhe të një përgjegjësie historike, të cilën populli shqiptar e hodhi mbi supet tona, me peshën e jashtëzakonshme të plot 83 mandateve. Janë 83 gurë në kurriz”.
“Se është faji ynë që, siç thotë ajo fjala popullore, kur ata çohen nga gjumi dhe ata thonë rrush, ne kemi mbushur koshat. Duke e filluar punën për ditën e zgjedhjeve të tjera, sapo ka rënë dielli i zgjedhjeve të kryera. Jemi ne hajdutët pse madhështorëve u mungojnë gati 200 mijë vota nga katër vjet më parë, kur nuk ishin madhështorë, por ishin ku e ku më të organizuar e konkurrues sesa këtë herë që u ofruan shqiptarëve për kryeministër një kufomë ambulante me kapelen e Donald Trump. Dhe u premtuan një magji të madhe si në atë lojën e fëmijëve fluturon-fluturon-fluturon gomari. Dhe në fund, gomari nuk fluturoi”. Tv Klan
