Dritan Gjika, i cilësuar nga autoritetet ekuadoriane si një figurë kyçe e mafies shqiptare në Ekuador, është arrestuar ditën e sotme (26 maj) në Emiratet e Bashkuara Arabe. Lajmin e ka bërë të ditur Ministria e Brendshme e Ekuadorit përmes një postimi në rrjetin social X, ku konfirmohet se arrestimi u realizua gjatë një operacioni ndërkombëtar.
Dritan Gjika, i lindur në vitin 1976, ka jetuar në Ekuador që nga viti 2013 dhe është një emër i njohur për autoritetet lokale dhe ndërkombëtare. Ai u përfshi në një hetim të fshehtë të nisur nga policia ekuadoriane në vitin 2021, që kishte lidhje me Rubén Cherres, mik i Danilo Carrera — kunati i ish-presidentit të Ekuadorit, Guillermo Lasso. Cherres, i ekzekutuar pak kohë më parë, ishte bashkëortak me Gjikën në disa kompani.
Pavarësisht se, sipas të dhënave nga Shqipëria, Gjika ka vetëm shkollë të mesme dhe nuk ka precedentë penalë në vendin e tij, financat e tij në Ekuador morën hov gjatë periudhës së pandemisë. Nga viti 2015 deri më 2018, nuk rezulton të ketë paguar tatim mbi të ardhurat. Në vitet 2019-2020 ai pagoi shuma të vogla, ndërsa në vitin 2021 pagoi mbi 15 mijë dollarë taksa dhe mbi 3,700 dollarë për dalje valutash. Në vitin 2022, ndonëse nuk pagoi tatim mbi të ardhurat, kontribuoi sërish me afro 1,800 dollarë në dalje valutash.
Në qershor 2021, Gjika regjistroi një duzinë kompanish në të njëjtën ditë së bashku me Cherres, me një sërë objektesh të ndryshme, nga prodhimi i mishit, te turizmi dhe promovimi i shfaqjeve – një veprimtari që ka ngritur dyshime të forta për aktivitete pastrimi parash.
Edhe pse i pastër në Shqipëri, Gjika është përballur me probleme me autoritetet italiane, të cilat e dëbuan nga Treviso në shtator të vitit 2021 për mungesë dokumentacioni. Ai ka udhëtuar shpesh mes Shqipërisë dhe Dubait, dhe më 7 janar 2023 – pak para daljes së materialeve të para hetimore mbi aktivitetin e tij – është larguar drejt Turqisë, pas së cilës nuk kishte më gjurmë të qarta për vendndodhjen e tij.
Arrestimi i tij i sotëm konsiderohet si një hap i rëndësishëm në luftën ndërkombëtare kundër krimit të organizuar shqiptar me bazë në Amerikën Latine dhe Lindjen e Mesme.
