Kandidati i listës së hapur të Partisë Demokratike në qarkun Durrës, Aulon Kalaja, i cili doli i dyti më i votuar në listë pa siguruar mandat, ka bërë akuza të rënda në një emision televiziv.
Kalaja u rendit pas Arian Ndojës, i cili deri tani ka grumbulluar 8,209 vota, ndërsa ai 7,255. Ai pretendon se votat e tij janë manipuluar brenda kutisë dhe drejton akuza brenda partisë së tij.
“I kam bërë thirrje SPAK që këtë telefon ta vinin në përgjim dhe të shihnin kam blerë vota. Këto janë vota të pastra, unë nuk i njoh njerëzit që më kanë votuar. E kam me konkurrentët brenda partisë, jo vetëm ma kanë vjedhur por dhe ma kanë trafikuar brenda kutisë, dhe për këtë do të bëjë kallëzim. Krimi është brenda kutisë, dhe i kam lënë vetë, që të shkojmë në prokurori se dikush duhet të bëhet shembull,” tha Kalaja.
Ai paralajmëron se do të ndjekë rrugën ligjore për të zbardhur çështjen dhe për të nxjerrë përgjegjësit para drejtësisë.
