Ish-anëtarja e Partisë Demokratike, Alesia Balliu, ka kritikuar ashpër listën e kandidatëve të PD-së në qarkun e Elbasanit, duke e cilësuar atë si jopërfaqësuese dhe të shkëputur nga baza.
E ftuar në një studio televizive, Balliu deklaroi se kryetari i PD-së, Sali Berisha, po përdor sulmet ndaj figurave të njohura si Suel Çela thjesht për efekt propagandistik, ndërkohë që në listat e partisë, sipas saj, ndodhen kandidatë që kanë mbështetur figura të lidhura me të njëjtin person që Berisha e sulmon.
“Është tragjike sepse ke një listë jopërfaqësuese. Kur kemi një listë të tillë, padiskutim do të jetë diferencë e thellë. Del Berisha bëhet komik, sulmon Suel Çelën, ndërkohë ke një kandidat në listë të mbyllur që ka votuar Tregun. Berisha sulmon Çelën ku ka në podium njerëz që kanë votuar atë,” – tha Balliu.’
Ajo theksoi se ky qëndrim kontradiktor ka krijuar pakënaqësi të thella në bazën e PD-së në Elbasan, e cila sipas saj, e sheh këtë si një dëshmi se “janë bashkë”. Sipas Balliut, disa prej kandidatëve të listës së mbyllur kanë lidhje të ngushta me familjen e Suel Çelës, ndërkohë që Berisha e portretizon atë si figurë kriminale në deklaratat publike.
