Policia e Tiranës ka shpallur në kërkim Arjan Telhallarin dhe djalin e tij, të përfshirë në një incident të ndodhur këtë të hënë në rrugën “Ali Demi”, pranë zyrës elektorale të Partisë Socialdemokrate (PSD).
Sipas deklaratës zyrtare të policisë, ngjarja ndodhi rreth orës 14:00 kur në sallën operative u raportua për një konflikt fizik mes disa personave në ambientet e një zyre elektorale. Gjatë këqyrjes së vendit të ngjarjes, policia gjeti dëmtime me sende të forta në xhamin e zyrës dhe dy fishekë të pa shpërthyer në tokë.
Hetimet paraprake tregojnë se gjithçka nisi pas një sherri mes një të riu dhe një tjetër në zonë. I riu më pas njoftoi të atin, Arjan Telhallari, që dyshohet se ka qenë nën efektin e alkoolit. Të dy janë kthyer më vonë në vendin e ngjarjes për të kërkuar personin me të cilin kishte ndodhur konflikti dhe janë futur në zyrën elektorale ku ndodhej i riu, duke shkaktuar përplasje fizike. Policia dyshon se Telhallari ka qenë i armatosur, dhe gjatë përplasjes i kanë rënë disa fishekë në tokë.
Të dy personat janë larguar nga vendi i ngjarjes me automjet dhe janë aktualisht në kërkim nga forcat e rendit.
Partia Socialdemokrate ka reaguar përmes një deklarate publike, duke theksuar se incidenti nuk ka asnjë lidhje me aktivitetin apo zyrën e tyre elektorale.
“Ngjarja e ndodhur këtë mesditë në rrugën ‘Ali Demi’ nuk ka asnjë lidhje me zyrën tonë elektorale apo me aktivitetin e Partisë Socialdemokrate. Asnjë nga anëtarët apo simpatizantët tanë nuk ka qenë i përfshirë në konfliktin në fjalë,” thuhet në reagimin e PSD.
