Borsh, 24 prill 2025 – Nga Borshi, kreu i Partisë Demokratike Sali Berisha ka goditur ashpër kundërshtarin e tij politik, Edi Ramën, duke e akuzuar për një qeverisje të bazuar në propagandë, batuta dhe vjedhje sistematike.
Në miting, Berisha e quajti fushatën e Ramës një “fushatë të batutës” dhe e krahasoi kryeministrin me “hajdutin që të bën për të qeshur, ndërkohë që të ka futur dorën në xhep dhe të ka marrë kuletën”.
Sipas Berishës, çdo batutë e Ramës maskon një mungesë serioze politike dhe sociale në vend. Ai theksoi se nuk janë batutat ato që krijojnë vende pune, ndihmojnë të rinjtë apo mbështesin pensionistët, por përkundrazi përdoren për të fshehur të vërtetën e hidhur të mijëra familjeve shqiptare.
“Pas çdo batute fshihet një vjedhje”
Berisha foli me tone të forta për disa nga aferat më të përfolura, përfshirë çështjen e inceneratorëve, rastin Bechetti dhe kontratën e check-up-it, duke deklaruar se Rama dhe bashkëpunëtorët e tij kanë zhdukur qindra milionë euro nga buxheti i shtetit.
“Djegësi i Tiranës nuk ekziston. Pas 6 vitesh aty nuk ka asnjë tullë, por janë zhdukur 130 milionë euro të taksapaguesve shqiptarë,” – deklaroi ai, duke shtuar se për çdo vjedhje nga një ministër, Rama është përfshirë drejtpërdrejt.
Sipas tij, qeveria aktuale është kthyer në një “tabor hajdutësh” ku askush nuk përgjigjet, ndërsa qytetarët përballen me varfëri, emigrim dhe mungesë të theksuar shprese.
Apel për ndëshkim me votë më 11 maj
Në vijim të deklaratës, Berisha u bëri thirrje qytetarëve të Borshit dhe të gjithë vendit që të mos bien pre e fjalimeve argëtuese dhe propagandës, por të votojnë për ndryshimin.
“Mos e lini Ramën të vazhdojë të luajë me fatin tuaj. Mos harroni që pas çdo batutë, fshihet një vjedhje. Kontrolloni xhepat – sepse diçka ju ka marrë,” – ishte apeli i tij.
Berisha nënvizoi se zgjedhjet e 11 majit janë vendimtare për fatin e vendit dhe për mundësinë që Shqipëria të çlirohet nga, sipas tij, një regjim i konsumuar dhe i korruptuar.
Premtimet e Sali Berishës për qytetarët shqiptarë:
Për të rinjtë: Të ndërtojnë të ardhmen e tyre në Shqipëri dhe të mos detyrohen të emigrojnë.
Për pensionistët: Jetë më të denjë dhe mbështetje konkrete për përballimin e jetesës.
Për fermerët: Mbështetje për zhvillimin e fermave dhe rritjen e prodhimit vendas.
Për bizneset: Liri dhe mundësi për zgjerim pa presione dhe pa korrupsion.
Për gjithë Shqipërinë: Rritje ekonomike, drejtësi të pavarur dhe një Shqipëri madhështore që ngrihet në lartësinë e potencialit të saj.
