Drejtuesi politik i Partisë Demokratike për Qarkun e Dibrës, Xhelal Mziu, i është përgjigjur deklaratave të Edi Ramës gjatë fjalimit të tij në Peshkopi, ku ky i fundit i cilësoi “çyrykë” burrat që do të votonin për PD-në dhe i bëri thirrje grave t’i ndanin.
Nga Kepi i Xhitetit në Çidhën, një vend simbolik për qëndresën dhe historinë e Dibrës, Mziu tha se dibranët kanë lidhur sërish besën për të mos u përkulur përballë askujt.
“Këtu, ku mali flet me burrërinë dhe historia me gjakun e derdhur për liri, burrat e Dibrës lidhën besën – të jetojnë me nder ose të vdesin pa u përkulur!” – shkruan Mziu.
Ai akuzoi Ramën se po përpiqet të poshtërojë burrat e Dibrës dhe të përdhosë vlerat e kësaj zone, por theksoi se asnjë pushtet, qoftë osman, serb apo komunist, nuk ka mundur t’i nënshtrojë dibranët.
“Një ‘Çyryk’ si Edi Rama – kurrë s’mund të poshtërojë atë që historia ka ngritur në piedestalin e lavdisë. Ai mund të përdhosë institucione, por jo zemrat e dibranëve,” tha Mziu.
Ai i cilësoi gratë dibrane si “burrnesha” dhe “nderi i familjes”, duke refuzuar me indinjatë mënyrën si iu referua Rama grave dhe burrave në fjalimin e tij.
“Familja për ne është e shenjtë. Gratë tona janë burrnesha, janë nderi ynë. Askush nuk ka të drejtë t’i fyejë! E aq më pak një ‘çyryk pa brekë’, që s’ka as nder, as burrëri, as dinjitet!”
Në fund, Mziu përsëriti mesazhin e vendosmërisë së dibranëve në zgjedhjet e 11 majit:
“Dibra nuk fal! Dibra nuk harron! Dibra nuk nënshtrohet! Më 11 maj, ne lidhim sërish besën – për Dibrën, për Shqipërinë, për lirinë!”
