Kreu i Partisë Demokratike, Sali Berisha, ka akuzuar ministren e Infrastrukturës dhe Energjisë, Belinda Balluku, për marrjen e 50 milionë eurove nga projekti i tunelit të Llogarasë. Berisha tha se ky projekt ka shkatërruar pamjen natyrore të zonës dhe ka pasur si qëllim përfitime personale. Ai shtoi se ky projekt ka mbyllur një nga pamjet më madhështore të detit, për të ndihmuar korrupsionin në shërbim të interesave të përkohshme.
Po ashtu, Berisha akuzoi Ballukun dhe kryeministrin Edi Rama për ndërmarrjen e projekteve që, sipas tij, po dëmtojnë bizneset në parkun e Llogarasë. Berisha premtoi se kur Partia Demokratike të vijë në pushtet, kjo situatë do të korrigjohet dhe investimet në parkun e Llogarasë do të jenë të mirëplanifikuara dhe të qëndrueshme.
Berisha:
“A e dini ju që me tunelin e Llogarasë, ja mbylli sytë qafës më të bukur që ka Shqipëria, që hapet pamja më madhështore e detit, për të marrë 50-60 milionë euro me Lubi Ballukun dhe tani ndërton rrugën për ti falimentuar të gjitha bizneset e parkut të Llogarasë. I garantoj ata se ajo do korrigjohet. Investimet në parkun e Llogarasë janë investimet më të mira.”
