Nga Namir Lapardhaja
Një ndër arsyet që një pjesë e të fortëve janë larguar nga Rama dhe janë afruar me Berishën, është se janë të qejfmbetur me të parin se nuk i ka mbrojtur nga drejtësia dhe SPAK, ndërkohë që i dyti i ka dhënë ‘garanci’ që pas zgjedhjeve do ta shkrijë SPAK-un dhe do ta rindërtojë drejtësinë e re me modele të Gjin Gjonit apo Arjan Ndojit.
Problemi është se i pari nuk po mbron dot veten e vet dhe njerëzit e tij të afërt nga SPAK-u e jo më të mbrojë problematikët me ngarkesat e mëdha që mbajnë ata mbi shpinë në raport me drejtësinë dhe me problematikat që ata hapin përditë me rendin dhe ligjin. Ndërsa Berisha po i përdor, ashtu siç i ka përdorur një herë në ’96, pastaj i mblodhi të gjithë në të gjithë Shqipërinë për 24 orë, duke nisur kështu çarjen e parë të madhe mes PD-së dhe kësaj kategorie.
Jo vetëm kaq, as Berisha nuk ka garanci që do ta zhbëjë drejtësinë dhe SPAK-un. Së pari, sepse nuk do mundet dhe, së dyti, sepse nuk do ta lejojë kush. Vetëm nëse do bashkojë votat me Edi Ramën, siç bëri për lirimin e të korruptuarëve dhe për ndryshimin e Kodit Zgjedhor, mund të ketë një mundësi të vogël. Pavarësisht gjithçkaje, koha ka treguar se kush futet në ingranazhet e Pokurorisë së Posaçme s’ka Ramë që ta shpëtojë.
Ndaj bëjnë mirë të mos përzien me presione, futje dorë në zgjedhje apo me kërcënime ndaj njerëzve dhe votuesve, sepse kjo që po ndodh me SPAK-un nuk është shaka. Shihni Ramën, Berishën, Metën, Veliajn, Tahirin, Beqajn, Ahmetajn… nëse nuk e besoni.
