Sali Shehu, kandidat për deputet nga Aleanca për Shqipërinë Madhështore, ka folur për angazhimin e tij dhe qëllimet politike në një intervistë në studion e News 24. Ai theksoi se është në “listë të hapur” për shkak të përvojës së tij në betejat politike dhe angazhimin e tij të madh për Shqipërinë.
Shehu shprehu pakënaqësinë e tij ndaj qeverisjes aktuale të Kryeministrit Edi Rama, duke e quajtur këtë periudhë një “katandisje” për shqiptarët, duke theksuar se shumë prej atyre që kishin pasur shpresë tek Rama tani janë të zhgënjyer. Sipas Shehut, Rama ka qëndruar shumë gjatë në pushtet dhe se besnikët e vet i donte dhe me mjekra.
Shehu theksoi rëndësinë e bashkimit të shqiptarëve, duke shtuar se ky është çelësi për të dalë nga situata e vështirë që ka krijuar qeveria aktuale. Ai gjithashtu përmendi një koalicion të madh, si një mundësi për të krijuar një qeveri të besueshme dhe të drejtë për qytetarët.
Në lidhje me platformën e tij politike, Shehu premtoi një minimum jetik prej 200 eurosh për qytetarët dhe shprehu angazhimin e tij për të luftuar varfërinë ekstreme. Ai nënvizoi gjithashtu se është një avokat i interesave të qytetarëve dhe ftoi qytetarët e Tiranës, dibranët dhe të ardhurit në kryeqytet që ta mbështesin atë ose kandidatët e tjerë të Aleancës për Shqipërinë Madhështore.
Sali Shehu: Jam në listë të hapur sepse jam njeri i betejave. Të qenit deputet është mision dhe jo punë. Kryeministri Rama erdhi si shpresë për shqiptarët dhe u katandis si fatkeqësi. Ne jemi të bashkuar, vetëm bashkimi i shpëton shqiptarët nga fatkeqësia. Ne duhet të takojmë çdo shqiptar që kërkon të ardhmen në Shqipëri. Të gjithë shqiptarët e duan Shqipërinë Madhështore. 70 përqind e atyre që kishin shpresat tek Rama, janë sot të zhgënjyer. Rama ka shumë kohë në pushtet. Edi Rama kultivoi “historinë” e mjekrave. Të gjithë burrat afër tij qëndruan me mjekra që të jenë të preferuar të tij. Ka pakënaqësi të madhe ndaj qeverisë. Pakënaqësinë e madhe e kanë qytetarët, ne kemi detyrimin që përmes koalicionit të madh, të sjellim qeveri të besueshme dhe të drejtë. Shumë aleatë ia kanë mbyllur dyert Ramës. La Civita është njeri i mençur që na ka dhënë këshilla të vlefshme. Sali Shehu meriton të jetë deputet, kam mbrojtur Tiranën më 1997. Kush voton për mua, votojnë një avokat të interesave të tyre në parlament. Unë ftoj tiranasit, dibranët dhe të ardhurit në kryeqytet që të më votojnë mua ose personalitete të tjera të Aleancës për Shqipërinë Madhështore. Programi i PD është i hapur, premtojmë 200 euro minimum jetik. Ne duam të shkulim varfërinë ekstreme.
