Kreu i Grupit Parlamentar të PD dhe drejtuesi politik i qarkut Fier, Gazment Bardhi, ka denoncuar publikisht shpërdorimin e granteve në Bashkinë e Roskovecit. Sipas tij, fondet e destinuara për bujqësinë janë përdorur për ndërtimin e një bujtine nga mamaja e kandidates së PS për Roskovecin, Zegjine Caushi.
Bardhi ka akuzuar hapur Caushin dhe të tjerë të lidhur me pushtetin për përfitime personale dhe abuzim me fondet publike, duke theksuar se këto grante nuk kanë shkuar për fermerët e zakonshëm, por për familjarët e kandidatëve të Partisë Socialiste.
“Refuzojini me votë kopjet e këqija të Edi Ramës dhe Belinda Ballukut! Nuk ka rëndësi ç’moshë kanë. Edhe kur janë të rinj, kanë mentalitetin e zhvatjes së parave, përfitimit personal dhe abuzimit me pushtetin,” u shpreh Bardhi.
Ai shtoi se modeli i pushtetit të PS në 12 vitet e fundit është bazuar tek përfitimi personal, ndërsa qytetarët janë lënë pas dore. “Në 11 Maj, është radha edhe e socialistëve të ndershëm që të ndëshkojnë me votë ata që i braktisën, i zhgënjyen dhe i përdorën për pasurimin e vetes dhe familjeve të tyre,” theksoi ai.
