Seanca parlamentare e sotme u zhvillua mes tensioneve të forta, ndërsa në qendër të debatit ishte arrestimi i kryebashkiakut të Tiranës, Erion Veliaj, nga SPAK.
Përplasjet mes deputetëve të mazhorancës dhe opozitës e bënë të pamundur vijimin normal të punimeve, çka detyroi kryetaren e Kuvendit, Elisa Spiropali, të ndërpresë seancën dhe ta shtyjë atë për të hënën në orën 10:00.
Megjithatë, pas debateve të ashpra në sallë, jashtë Kuvendit situata ishte krejt ndryshe. Deputetë nga të dyja kampet politike, përfshirë Damian Gjiknurin, Niko Peleshin dhe Sali Berishën, u panë duke shkëmbyer batuta.
