Ish-zëvendëskryeministri dhe deputeti Arben Ahmetaj ka bërë akuza të forta ndaj Strukturës së Posaçme Anti-Korrupsion (SPAK), duke e akuzuar këtë institucion për veprime të motivuara politikisht kundër tij dhe të afërmve të tij. Në një deklaratë për mediat, Ahmetaj tha se SPAK ka vepruar në mënyrë të padrejtë, duke përfshirë gruan dhe ish-gruan e tij në hetime si dhe duke kërcënuar denoncuesit pas intervistave të tyre.
“SPAK ka vepruar, ka akuzuar gruan dhe ish-gruan time. Ka vepruar ndaj denoncuesit. Ka vepruar duke kërcënuar, pas intervistës së dytë. Ka vepruar duke thënë se tani që mbaruam me Berishën, ia tregojmë atij,” deklaroi Ahmetaj.
Këto akuza vijnë në një kohë kur SPAK ka intensifikuar hetimet ndaj një sërë zyrtarësh të lartë në kuadër të luftës kundër korrupsionit dhe abuzimit me detyrën. Ahmetaj ka mohuar të gjitha akuzat ndaj tij dhe ka deklaruar se po përballet me një fushatë të padrejtë dhe të motivuar politikisht, e cila synon të dëmtojë figurën e tij.
Ai tha gjithashtu se veprimet e SPAK ndaj tij dhe personave të afërt janë shembull i një qasjeje të padrejtë dhe të njëanshme të drejtësisë, duke sugjeruar se institucionet janë duke vepruar nën presione të ndryshme.
Nga ana tjetër, SPAK nuk ka reaguar ende në lidhje me akuzat e bëra nga ish-zëvendëskryeministri.
