Deputeti i PD, Luan Baçi, i ftuar në një studio televizive ka shprehur pakënaqësinë e tij me vështirësinë e emigrantëve shqiptarë për të votuar për shkak të skadencës së dokumenteve të tyre si pasaporta apo karta identiteti shqiptare.
Baçi parashikoi se PS do ta realizojë mundësinë e votimit për këta individë në momentet e fundit, pasi një pjesë e madhe të kenë aplikuar për rinovimin e dokumenteve të tyre.
Ai theksoi se qeveria duhet të veprojë që tani duke qetësuar këta emigrantë duke u thënë se do të munden të votojnë me dokumentet e tyre, edhe pse të skaduara, ndërsa u apelon për rinovimin e tyre në vijim.
Deputeti shtoi se përndryshe emigrantëve do t’u vendoset një detyrim dhe duke bërë që dëshira e tyre për të votuar në zgjedhje të lidhet me procesin e rinovimit të kartave apo pasaportave të tyre shqiptare.
“Mendoj se PS do ta realizojë një gjë të tillë dhe do të nxjerrë një udhëzim në momentet e fundit pasi të kenë aplikuar emigrantët me dokumente të skaduara për të marrë pasaporta e karta dhe ata që ngelën, hajde se po nxjerrim një udhëzim. Qeveria duhet ta thotë që tani që të qetësohen shqiptarët, që do votojnë me dokumentet që kanë, por bëjmë thirrje që të rinovohen, por kjo nuk do të jetë pengesë. Ndryshe u vendosim detyrime, që dëshira e tyre për të votuar të lidhet me rinovimin e kartës apo pasaportës”, u shpreh ai.
