Ministrja e Shëndetësisë dhe Mbrojtjes Sociale, Albana Koçiu, njoftoi se gjatë vitit 2024 janë administruar 16,259 vaksina HPV, me 6,492 të administruara te vajzat 13 vjeçe dhe 9,767 te grupmosha 14-20 vjeç, në kuadër të fushatës së zgjeruar.
Vaksina HPV mbron nga disa lloje të papilomavirusit njerëzor, një virus që mund të shkaktojë kancer të qafës së mitrës dhe kancere të tjera.
Ajo ndihmon në parandalimin e infeksioneve dhe zvogëlon rrezikun e zhvillimit të sëmundjeve të lidhura me HPV. Koçiu theksoi se vaksina vijon të ofrohet për vajzat e moshës 13-20 vjeç në të gjithë vendin, dhe është përfshirë në Programin Kombëtar të Imunizimit për vajzat që mbushin moshën 13 vjeç.
Vaksina HPV ofrohet në një dozë të vetme, sipas vlerësimeve të Komitetit Kombëtar të Ekspertëve të Imunizimit dhe rekomandimeve të ekspertëve të OBSH.
