Një 14-vjeçar humbi jetën dhe një tjetër u plagos, si pasojë e një konflikti ku janë përfshirë 5 të mitur, tre prej të cilëve dyshohet se janë autorë të ngjarjes së rëndë. Ngjarja e rëndë ka ndodhur në një rrugicë, rreth 150 metra larg shkollës Fan S.Noli.
Kamerat e sigurisë, të cilat janë marrë nga policia, tregojnë viktima dhe i plagosuri janë sulmuar nga 3 bashkëmoshatarë të tyre (14 vjeçarë) fillimisht me grushte dhe më pas janë goditur me thikë. Dyshohet se konflikti ka nisur në rrjetet sociale dhe më pas ka ndodhur edhe përleshja fizike mes tyre. Policia ka identifikuar 3 personat që dyshohet se janë autorë të krimit, njëri prej të cilëve është shoqëruar në polici, ndërsa dy të tjerët pritet të shoqërohen.
Banorë të zonës thanë se dy të miturit që u sulmuan fillimisht janë shoqëruar në ambulancën aty pranë, dhe më pas janë transportuar drejt Traumës, ku njëri prej tyre ka humbur jetën, si pasojë e plagëve me thikë, ndërsa tjetri ndodhet në një gjendje stabël. Sakaq, sipas dëshmive të banorëve të zonës, ambulanca që ka bërë transportin drejt Traumës është vonuar rreth 20 minuta.
Referuar të dhënave viktima dhe i plagosuri janë nxënës të shkollës Fan S. Noli, ndërsa 3 të tjerët nuk janë nxënës të kësaj shkolle.
